மேட்டுப்பாளையம்: காரமடை அரங்கநாதர் கோவிலில், நம்மாழ்வார் வைபவம் நடந்தது. கோவை மாவட்டத்தில் மிகவும் பிரசித்தி பெற்ற வைணவ ஸ்தலம், காரமடை அரங்கநாதர் கோவிலாகும். இங்கு, 12 ஆழ்வார்களில் நம்மாழ்வாருக்கு, ஜெயந்தி வைபவம், ஒவ்வொரு ஆண்டும் நடத்தப்பட்டு வருகிறது. நேற்று நம்மாழ்வார் ஜெயந்தியை முன்னிட்டு, வைபவம் நடந்தது. மூலவர் அரங்கநாதர் பெருமாளுக்கு சிறப்பு அபிஷேகம், காலசந்தி பூஜை ஆகியவை செய்யப்பட்டன. உற்சவர் நம்மாழ்வார் சிறப்பு அலங்காரத்தில், ராமானுஜர் சன்னதி முன்பாக எழுந்தருளினார். அங்கு அவருக்கு புண்ணிய வாசனம், கலச ஆவாஹனம், திருமஞ்சனம் செய்யப்பட்டது. பின்பு வெள்ளி சப்பரத்தில் கோவில் வளாகத்தில் வலம் வந்து, ரங்கம் மண்டபத்தில் எழுந்தருளினார். அவருக்கு பரிவட்டம், சடாரி மரியாதை செய்யப்பட்டது. கோவில் ஸ்தலத்தார் நல்லான் சக்கரவர்த்தி, வேத வியாச பட்டர் மற்றும் அர்ச்சகர்கள், திவ்ய பிரபந்தத்தில் நம்மாழ்வார் இயற்றிய, திருவாய் பாசுரங்களை சேவித்தனர். பின்பு கோவில் வளாகத்தில் மீண்டும் வலம் வந்த நம்மாழ்வார், ராமானுஜர் சன்னதியை அடைந்தார். இவ்விழாவில் பக்தர்கள் ஏராளமானவர்கள் பங்கேற்றனர்.