திருப்புத்துார்: திருப்புத்துார் திருத்தளிநாதர் கோயில் வைகாசி விசாக விழாவை முன்னிட்டு நேற்று நடந்த தெப்பத்துடன் விழா நிறைவடைந்தது.

குன்றக்குடி ஐந்து கோயில் தேவஸ்தானத்தைச் சேர்ந்த இக்கோயிலில் வைசாக விசாக விழா பத்து நாட்கள் நடைபெறும். கடந்த ஜூன் 3ல் கொடியேற்றத்துடன் துவங்கியது. தினசரி இரவில் சுவாமியும் அம்பாளும் வாகனங்களில் இரவில் திருவீதி உலா வந்தனர். ஜூன் 6 ல் திருத்தளிநாதருக்கு மந்திரநீர் முழுக்காட்டு, ஜூன்7 ல் திருக்கல்யாணம், ஜூன் 10 ல் காலையில் நடராஜர் புறப்பாடு, ஜூன் 11ல் தேரோட்டமும் நடந்தது. நேற்று வைகாசி விசாகத்தை முன்னிட்டு காலை 11:00 மணி அளவில் சுப்பிரமணியர் வள்ளி தெய்வானைக்கு சிறப்பு அபிேஷக, ஆராதனைகள் நடந்தன. திரளாக பக்தர்கள் பங்கேற்று சுவாமி தரிசனம் செய்தனர். தொடர்ந்து தெப்ப உத்ஸவத்தை முன்னிட்டு யோகபைரவர் சிறப்பு அலங்காரத்தில் பக்தர்களுக்கு அருள்பாலித்தார். நேற்று மாலை 5:00 மணி அளவில் பிரதோஷத்தை முன்னிட்டு நந்தி தேவருக்கும், மூலவருக்கு சிறப்பு அபிேஷக, ஆராதனகளும் நடந்தன. தொடர்ந்து இரவில் பஞ்சமூர்த்திகளும் தெப்பமண்டபத்தில் எழந்தருளினர். அங்கு சிறப்பு தீபாராதனை நடந்த பின் சுவாமியும், அம்பாளும் தெப்பத்தில் எழுந்தருளினர். தொடர்ந்து தெப்பம் சீதளிக்குளத்தில் மும்முறை வலம் வந்தது. பக்தர்கள் திரளாக குளத்தைச் சுற்றி நின்று சுவாமி தரிசனம் செய்தனர். பின்னர் பஞ்சமூர்த்திகளும் திருவீதி வலம் வந்து கோயிலில் எழுந்தருளலுடன் வைகாசி விசாக விழா நிறைவடைந்தது.