திருப்புத்தூர்: திருப்புத்தூர் அருகே நகர வயிரவன்பட்டி வடிவுடையாம்பாள் சமேத வளரொளிநாதர், வயிரவ சுவாமி கோயிலில் ஜூலை 23ல் பிரமோற்ஸவம் துவங்குகிறது.

இக்கோயிலில் ஆடி மாதம் வயிரவருக்கு 11 நாட்கள் பிரமோற்ஸவம் நடைபெறும். நாளை அதிகாலை 5:00 மணிக்கு அனுக்ஞை, கணபதி ஹோமமும், மாலை 4: 45 மணிக்கு வாஸ்து சாந்தி உள்ளிட்ட பூர்வாங்க பூஜைகள் நடந்து ஆச்சார்யருக்குகாப்புக்கட்டப்படும். பின்னர் மூலவருக்கு சிறப்புத் தீபாராதனை நடைபெறும். மறுநாள் காலையில் வெள்ளை சாத்தி சுவாமி புறப்பாடும், மாலை4:15 மணிக்கு யாகசாலை பூஜை, ஹோமம் நிறைவாகி சுவாமிக்கு காப்புக் கட்டி பிரமோற்ஸவம் துவங்குகிறது. இரவில் சிம்ம வாகனத்தில் வயிரவர் திருவீதி உலா நடைபெறும். தொடர்ந்து தினசரி காலை 9:15 மணிக்கு வெள்ளி ரதத்தில் சுவாமி புறப்பாடு, இரவில் வாகனங்களில் திருவீதி உலா நடைபெறும். ஜூலை 31 ல் ஒன்பதாம் திருநாளில் தேரோட்டம், மறுநாள் தீர்த்தவாரியும், ஆக. 2ல் திருக்கல்யாணத்துடன் பிரமோற்ஸவம் நிறைவடையும். ஏற்பாட்டினை ஏழக பெருந்திருவான வயிரவன் கோயில் நாட்டுக்கோட்டை நகரத்தார் செய்கின்றனர்.