மயிலாடுதுறை: வைத்தீஸ்வரன் கோவில் கோவிலில் 9 நாடுகளைச் சேர்ந்த 30 வெளிநாட்டினர் சுவாமி தரிசனம் செய்தனர்.

மயிலாடுதுறை மாவட்டம் சீர்காழி தாலுகா வைத்தீஸ்வரன் கோவிலில் தையல்நாயகி அம்பாள் சமேத வைத்தியநாத சுவாமி கோவில் அமைந்துள்ளது. தேவாரப் பாடல் பெற்ற இக்கோவிலில் நவகிரகங்களில் செவ்வாய் பகவான், செல்வ முத்துக்குமாரசுவாமி, 18 சித்தர்களின் முதன்மையான தன்வந்திரி தனித்தனி சன்னதிகள் எழுந்தருளி பக்தர்களுக்கு அருள் பாலித்து வருகின்றனர். இக்கோவிலில் உள்ள சித்தாமிர்த தீர்த்தத்தில் நீராடி சுவாமி, அம்பாளை வழிபட்டு, இங்கு வழங்கப்படும் திருச்சாந்து உருண்டையை உட்கொண்டால் 4448 வியாதிகள் குணமடையும் என கூறப்படுகிறது. இத்தகைய சிறப்பு வாய்ந்த கோவிலுக்கு நேற்று மாலை வாழும் கலை ஸ்ரீ ஸ்ரீ ரவிசங்கர் குருஜியின் சீடர் சுவாமி  பிரணவானந்தா தலைமையில் தைவான், ஸ்பெயின், கஜகஸ்தான், குரோஷியா, ரஷ்யா, இங்கிலாந்து, பங்களாதேஷ், அர்ஜென்டினா, உருகுவே ஆகிய 9 நாடுகளைச் சேர்ந்த 30 பேர் கொண்ட குழுவினர் வந்தனர். அவர்கள் சுவாமி, அம்பாள், செல்வமுத்துக்குமார சுவாமி, செவ்வாய் பகவான் சன்னதிகளில் சிறப்பு வழிபாடு நடத்தினர். துரை குருக்கள் தரிசனம் செய்து வைத்து, பிரசாதம் வழங்கினார். தரிசனத்திற்கான ஏற்பாடுகளை வாழும் கலை ஆசிரியர் சிவக்குமார் செய்திருந்தார். முன்னதாக வெளிநாட்டினர் நவகிரக தலங்களுக்கு சென்று வழிபாடு செய்து வந்தது குறிப்பிடத்தக்கது.