மயிலாடுதுறை: திருவாவடுதுறை ஆதீனத்திற்கு சொந்தமான கோமுக்தீஸ்வரர் கோயிலில் திருமூலர் குருபூஜை விழா விமரிசையாக நடந்தது.

திருமந்திரத்தை இயற்றிய திருமூலருக்கு அவர் சமாதியடைந்த திருவாவடுதுறை கோமுக்தீஸ்வரர் கோயிலில் குருபூஜை விழா:- திருவாவடுதுறை ஆதீனகர்த்தர் கலந்துகொண்டு, சிறப்பு பூஜைகள், கோபூஜை செய்தார்.

திருமூலர் ஞானசமாதி அடைந்த தலம் மயிலாடுதுறை மாவட்டம் குத்தாலம் அருகே திருவாவடுதுறை ஆதீனத்தில் உள்ள கோமுக்தீஸ்வரர் கோயிலில் உள்ளது. திருமூலர் சமாதி அடைந்த இடத்தில் அவருக்கு தனி சன்னதி அமைக்கப்பட்டுள்ளது. திருமூலர் கோமுக்தீஸ்வரர் கோயிலில் உள்ள படர்அரச மரத்தின்கீழ் தவமிருந்து ஆண்டுக்கு ஒரு பாடலாக 3000 பாடல்களை இயற்றினார். இந்த 3000 பாடல்களே திருமந்திரம் என்று அழைக்கப்படுகிறது. இந்நிலையில், திருமூலரின் குருபூஜை விழாவை முன்னிட்டு கோயிலின் தென்மூலையில் உள்ள திருமூல நாயனாருக்கு சிறப்பு அபிஷேக ஆராதனைகள் செய்யப்பட்டது. இதில், திருவாவடுதுறை ஆதீனம் 24-வது குருமகா சந்நிதானம் ஸ்ரீலஸ்ரீ அம்பலவாண தேசிக பரமாசாரிய சுவாமிகள் கலந்துகொண்டு, சிறப்பு பூஜைகளை நடத்தினார். தொடர்ந்து, பசுக்களுக்கு கோபூஜை நடத்தப்பட்டது. விழாவில், அருள் அரசர்களும் அடியார்களும் என்னும் நூல் வெளியீட்டு விழா நடைபெற்றது.