அன்னூர்: மகா சிவராத்திரி குறித்த ஆதியோகி ரதத்திற்கு அன்னூரில் பக்தர்கள் வரவேற்பு அளித்தனர்.

கோவை, வெள்ளியங்கிரி மலை அடிவாரத்தில், சத்குருவின் ஈஷா யோக மையம் செயல்பட்டு வருகிறது. இங்கு வரும் 18ம் தேதி மகா சிவராத்திரி விமர்சையாக கொண்டாடப்பட உள்ளது. இதை மக்களுக்கு தெரிவிக்கும் விதமாகவும் மகா சிவராத்திரி அன்று யோகத்தில் ஈடுபட்டால் நல்ல பலன் கிடைக்கும் என்பதை மக்களுக்கு தெரிவிக்கவும் ஆதி யோகி ரதம் ஏற்பாடு செய்யப்பட்டது. இத்தகவலை அனைவருக்கும் தெரிவிக்கும் வகையில் ஈஷா யோக மையத்திலிருந்து ஐந்து ரதங்கள் கடந்த டிச. 15ம் தேதி புறப்பட்டன. இதில் ஒரு ரதம் சென்னை மாநகர், செங்கல்பட்டு, விழுப்புரம், அரக்கோணம், சேலம், கோபி, புளியம்பட்டி வழியாக அன்னூருக்கு நேற்று காலை வந்தது. குமாரபாளையம், பிள்ளையப்பம் பாளையம், கரியாம்பாளையம், பொன்னே கவுண்டன்புதூர் ஆகிய இடங்களில் ஆதியோகி ரத்தத்திற்கு பக்தர்கள் சிறப்பான வரவேற்பு அளித்தனர். ஆதியோகி சிவனை வழிபட்டனர். சிவராத்திரி அன்று யோகத்தில் ஈடுபடுவது குறித்த துண்டு பிரசுரங்கள் பக்தர்களுக்கு விநியோகிக்கப்பட்டு, ஆதியோகி பிரசாதமும் வழங்கப்பட்டது. இன்று அன்னூரில், மைல்கல், ஜீவா நகர், சத்தி ரோடு உள்ளிட்ட அன்னூர் நகர பகுதியில் ஆதியோகி ரதம் செல்ல உள்ளது. இரவு சோமனூரில் தங்கி நாளை அவிநாசி மற்றும் திருப்பூர் பகுதிக்கு ஆதியோகி ரதம் செல்கிறது.