சின்னாளபட்டி: சின்னாளபட்டியில் 138 ஆண்டு பாரம்பரிய காமன் பண்டிகை, நேற்று இரவு துவங்கியது.

சின்னாளபட்டி கடைவீதியில் உள்ள காமய (காமன்) சுவாமி கோயில் திருவிழா, ஆண்டுதோறும் மாசி மாதத்தில் நடத்தப்படுகிறது. சிறப்பு பொருட்களால் அலங்கரிக்கப்பட்ட சுவாமி, ஊர்வலமாக அழைத்து வரப்பட்டு தினம் ஒரு கட்டளைதாரர் வீதம் 15 நாட்களுக்கு வழிபாடு நடக்கும். தினமும் கட்டளைதாரர்கள் வழங்கும் பலவித பூக்களால் அலங்கரிக்கப்பட்டு, ஆராதனைகள் நடப்பது வழக்கம். நிறைவாக, மாசி பௌர்ணமியில் காமன் தகன விழா நடக்கும்.

இந்த ஆண்டுக்கான விழா, நேற்று இரவு மூன்றாம் பிறை தரிசனத்துடன் பிருந்தாவன தோப்பு ராமஅழகர் கோயிலில் துவங்கியது. முன்னதாக பேக்கரும்பு, மா, ஆமணக்கு, அரசு, அரளி இலை, பூக்களால் சுவாமி அலங்கரித்தல் நடந்தது. பிறை தரிசனத்தை தொடர்ந்து, பரம்பரை நிர்வாக அறங்காவலர் ஜமீன்தார் முத்துக்குமார் தலைமையில் ராமா நகர் சுவாமிக்கு சிறப்பு பூச்சிகள் நடந்தது. அலங்கரிக்கப்பட்ட காமன் சுவாமியை, பூசாரி பால்பாண்டி தோளில் சுமந்தபடி கோவிலுக்கு ஊர்வலமாக அழைத்து வந்தனர். கோயில் பீடத்தில் சுவாமி ஊன்றுதலுடன், விசேஷ பூஜைகள் நடந்தது. சுற்றுப்புற பகுதிகளைச் சேர்ந்த ஏராளமான பக்தர்கள் பங்கேற்றனர். ஏற்பாடுகளை விழா குழு தலைவர் சிவமுருகேசன், செயலாளர் ராஜாராம், பொருளாளர் பொன்ராஜ் உள்ளிட்டோர் செய்திருந்தனர். மார்ச் 7ல் காமன் தகனமும், மார்ச் 9ல் சுவாமி எழுப்புதலும் நடக்க உள்ளது.