அவிநாசி: அவிநாசியில் எழுந்தருளியுள்ள ஸ்ரீ காரண பெருமாள் கோவிலில், மாசிமகம் சப்பரத்தேர் மற்றும் கவ்வாளம் விழாவில், தேர் வீதியுலா நடைபெற்றது. அவிநாசியில் ஸ்ரீ கருணாம்பிகை உடனமர் அவிநாசி லிங்கேஸ்வரர் கோவிலின் உப கோவிலான ஸ்ரீ காரண பெருமாள் கோவிலில் மாசி மகம் சப்பரத் தேர் மற்றும் கவ்வாளம் திருவிழா,கடந்த மாதம் 28ம் தேதி கொடியேற்றத்துடன் தொடங்கியது. முன்னதாக திருக்கல்யாண வைபவம் நடைபெற்றது. அதனைத் தொடர்ந்து, நேற்று ஸ்ரீ பூதேவி ஸ்ரீதேவி சமேத காரண பெருமாள் எழுந்தருளிய தேர் நான்கு ரத வீதிகளில் உலா வந்தது. இன்று,இரவு பரிவேட்டை, கவ்வாளம் உற்சவம், கருட வாகனத்தில் விசேஷ மேளத்துடன் சாமி திருவீதி உலா காட்சி நடைபெறுகின்றது. நாளை மஞ்சள் நீராட்டுடன் விழா நிறைவு பெறுகின்றது.