நத்தம், நத்தம் மாரியம்மன் கோவில் மாசிப் பெருந்திருவிழாவில் அம்மன் பூப்பல்லக்கில் நகர்வலம் வந்து பக்தர்களுக்கு அருள் பாலித்தார்.

நத்தம் மாரியம்மன் கோவில் மாசி பெருந்திருவிழா கடந்த பிப் 20 கொடி ஏற்றத்துடன் தொடங்கி நேற்று முன்தினம் கோவில் முன்பு அமைக்கப்பட்டிருந்த பூக்குழி தளத்தில் விரதமிருந்த 25 ஆயிரத்திற்கும் மேற்பட்ட பக்தர்கள் பூக்குழி இறங்கினார்கள். தொடர்ந்து நேற்று அம்மன் மஞ்சள் நீராட்டத்துடன் கோவிலில் இருந்து அம்மன் குளம் சென்றடைந்தார். திருவிழாவின் முக்கிய நிகழ்வாக பூப்பல்லக்கு திருவிழா நேற்று இரவு நடந்தது. இதில் அம்மன் குளத்திலிருந்து , பல்வேறு வண்ண பூக்களால் அலங்கரிக்க சிறப்பு அலங்கார பூப்பல்லக்கில் மாரியம்மன் எழுந்தருளினார்.மேளதாளம் முழங்க தீவட்டி பரிவாரங்களுடன் , வாண வேடிக்கையுடன் அம்மன் புறப்பாடு தொடங்கியது. நகரில் முக்கிய வீதிகள் வழியாக 15க்கும் மேற்பட்ட மண்டபங்களில் மாரியம்மன் பூப்பல்லக்கில் எழுந்தருளி பக்தர்களுக்கு அருள் பாலித்தார்.இன்று அதிகாலை அம்மன் கோவிலுக்கு வந்து இருப்பிடம் சேர்ந்தார். அப்போது மூலவருக்கும், உற்சவருக்கும், சிறப்பு பூஜைகளும், தீபாராதனைகள் நடந்தது. நிகழ்வில் பக்தர்கள் குவிந்து தரிசனம் செய்தனர்.