திருச்சி: திருவெள்ளறை புண்டரீகாட்ச பெருமாள் கோயில் பிரம்மோத்சவ விழாவில் இன்று இரவு கருட சேவை நடைபெறுகிறது.

திருச்சிக்கு அருகில் துறையூர் போகும் வழியில் அமைந்துள்ள இக்கோயில் சோழநாட்டில் அமைந்துள்ள 108 வைணவத் திவ்ய தேசங்களில் நான்கவது திவ்ய தேசமாகும். மூலவர் புண்டரீகாட்ச பெருமாள், உற்சவ மூர்த்தி செந்தாமரைகண்ணன், மற்றும் உற்சவ தாயார் திருநாமம் பங்கயச்செல்வி பங்கஜவல்லி ஆகும். வைணவ திவ்யதேசங்களின் நான்கவதான திருவெள்ளறை திருக்கோயிலில் நடைபெற்று வரும் பிரம்மோத்சவத்தின் மூன்றாம் திருநாளான நேற்று அதிகாலை உற்சவ மூர்த்திகளான செந்தாமரைக்கண்ணன் மற்றும் தாயார் பங்கயச்செல்வி உடன் அனந்தராயர் மண்டபத்திலிருந்து பல்லக்கில் புறப்பட்டு வழிநடை உபயங்கள் கண்டருளி, ஸ்ரீரங்கத்தில் அமைந்துள்ள வடதிருக்காவிரி (கொள்ளிடம்) ஆஸ்தான மண்டபத்திற்கு காலை 9.00 மணியளவில் வந்தடைந்தார். அங்கு ஆஸ்தானம் இருந்து பக்தர்களுக்கு அருள்பாலித்தார். பிரம்மோத்சவத்தின் நான்காம் திருநாளான இன்று (13.03.23) அதிகாலை 01.30 மணிக்கு கொள்ளிடத்திலிருந்து புறப்பட்டு வழிநடை உபயங்கள் கண்டருளி  திருவெள்ளறை திருக்கோயிலின் கண்ணாடி அறை சென்றடைந்தார். இரவு 7.30 மணிக்கு உற்சவ மூர்த்தி பெருமாள் கருட வாகனத்தில் புறப்பட்டு திருவீதி உலா வந்து பக்தர்களுக்கு அருள் பாலித்து கண்ணாடி அறை சேருகிறார்.