சென்னை, சென்னை, வல்லபாச்சார்யா வித்யா சபா, அரும்பாக்கம், டி.ஜி.வைஷ்ணவ் கல்லுாரி ஏற்பாட்டில், திருமலை திருப்பதி தேவஸ்தானம் சார்பில், ஸ்ரீனிவாசர் திருக்கல்யாண வைபவம், கல்லுாரி வளாகத்தில் நடந்தது.

 இதற்காக, திருமலை கோவிலில் இருந்து ஸ்ரீதேவி, பூதேவி நாச்சியாருடன் உற்சவர் ஸ்ரீனிவாச பெருமாள் எழுந்தருளினார். நேற்று மாலை, 6:00 மணிக்கு திருக்கல்யாண வைதீக காரியங்கள் துவங்கின. விழா துவக்கத்தில் புண்ணியாகவாசனம் நடந்தது. தொடர்ந்து நவதானியங்களால் பாலிகை பூஜை நடத்தப்பட்டது. அடுத்ததாக, ஸ்ரீனிவாச பெருமாளுக்கு காப்பு கட்டும் நிகழ்வு நடந்தது. தொடர்ந்து, யாகசாலை வளர்க்கப்பட்டு, அக்னி பிரதிஷ்டை நடந்தது. தொடர்ந்து மாங்கல்ய பூஜை, மாங்கல்யதாரணமும், சுவாமிக்கு ஆரத்தியும் எடுக்கப்பட்டது. ஸ்ரீனிவாச பெருமாளுடன் ஸ்ரீதேவி, பூதேவி நாச்சியார் சேர்க்கப்பட்டனர். இறுதியில், மங்கள ஆரத்தியுடன் திருக்கல்யாணம் பூர்த்தியானது. இந்நிகழ்வில், திருமலை திருப்பதி தேவஸ்தான தமிழக ஆலோசனைக் குழு தலைவர் சேகர், வி.வி.சபா செயலர் மனோஜ்குமார் சந்தாலியா, கல்லுாரி செயலர் அசோக்குமார் முந்த்ரா உட்பட, ஏராளமான பக்தர்கள் பங்கேற்றனர்.