திருப்புவனம்: திருப்புவனம் , திருப்பாச்சேத்தி நகருக்குள் தாயமங்கலம் செல்லும் சிறப்பு பேருந்துகள் வர மறுப்பதால் பக்தர்கள் வேதனையடைந்துள்ளனர். மதுரையில் இருந்து தாயமங்கலத்திற்கு திருப்புவனம், திருப்பாச்சேத்தி, மானாமதுரை வழியாக சிறப்பு பேருந்துகள் இயக்கப்பட்டு வருகின்றன.பங்குனி திருவிழா தொடங்கியுள்ள நிலையில் திருப்புவனத்தைச் சுற்றியுள்ள 100க்கும்மேற்பட்ட கிராமமக்கள் தாயமங்கலம் செல்ல திருப்புவனம் வந்துதான் செல்ல முடியும், மதுரையில் இருந்து இயக்கப்படும் சிறப்பு பஸ்கள் திருப்புவனம், திருப்பாச்சேத்தி ஊருக்குள் வராமல் பைபாஸ் ரோட்டிலேயே சென்று வருகின்றன. இதனால் பக்தர்கள் மானாமதுரை, திருப்பாச்சேத்தி சுங்கச்சாவடி சென்று பஸ் ஏற வேண்டியுள்ளது. சுங்கச்சாவடியில் பஸ் நிறுத்தப்பட்டாலும் பக்தர்களை ஏற்ற மறுக்கின்றனர். மதுரை- தாயமங்கலம் கட்டணம் செலுத்தினால் மட்டும் பயணம் செய்ய அனுமதிப்போம் என்கின்றனர். இதனால் பக்தர்கள் தாயமங்கலம் செல்ல முடியாமல் சிரமத்திற்குள்ளாகின்றனர். போக்குவரத்து கழகங்கள் சிறப்பு பஸ்களை திருப்புவனம் , திருப்பாச்சேத்தி நகருக்குள் வந்து செல்ல நடவடிக்கை எடுக்க வேண்டும்.