ஆர்.எஸ்.மங்கலம்: ஆர்.எஸ்.மங்கலம் திரௌபதி அம்மன் கோயில் வருடாபிஷேக விழா நடைபெற்றது. முன்னதாக, விழாவை முன்னிட்டு, கணபதி ஹோமம் மற்றும் யாகசாலை பூஜைகள் நடைபெற்றன. பின்பு மூலவருக்கு சந்தனம், குங்குமம், பால், பன்னீர், இளநீர் உள்ளிட்ட 18 வகையான அபிஷேக ஆராதனைகள் செய்யப்பட்டன. தொடர்ந்து, யாகசாலையில் பூஜை செய்யப்பட்ட புனித நீர், மூலவருக்கு ஊற்றப்பட்டு அபிஷேகம் நடைபெற்றது. பின்பு, மூலவருக்கு சிறப்பு அலங்காரம் செய்யப்பட்டு, தீப ஆராதனை காண்பிக்கப்பட்டன. இதில், ஏராளமான பக்தர்கள் கலந்து கொண்டு தரிசனம் செய்தனர். விழா ஏற்பாடுகளை, இந்து பேரவை தலைவர் கந்தசாமி, செயலாளர் அஜய்நாத், பொருளாளர் சசிகுமார் உள்ளிட்ட இந்து பேரவை நிர்வாகிகள் செய்திருந்தனர். விழாவை முன்னிட்டு அன்னதானம் நடைபெற்றது.