பல்லடம்: பல்லடம் அருகே கண்டுபிடிக்கப்பட்ட ஆஞ்சநேயர் கோவிலுக்கு சொந்தமான நிலங்கள் மீட்கப்படுமா என பக்தர்கள் எதிர்பார்ப்பு தெரிவித்துள்ளனர்.

பல்லடம் அடுத்த, மாதப்பூர் கிராமத்தில், 500 ஆண்டுக்கு முந்தைய பழமையான அனுமந்தராயர் கோவில் சமீபத்தில் கண்டுபிடிக்கப்பட்டது. முற்புதர்களுக்குள் மறைந்திருந்த இக்கோவில், மற்றும் சில கல்தூண்கள், சிலைகள் உள்ளிட்டவை அறநிலையத்துறை மற்றும் ஊராட்சி நிர்வாகத்தின் முயற்சியால் வெளிக்கொண்டு வரப்பட்டது. இக்கோவிலுக்கு சொந்தமாக, 50 ஏக்கருக்கு மேல் நிலம் உள்ளதாகவும், அவற்றை சிலர் ஆக்கிரமிப்பில் வைத்துள்ளதாகவும் கூறப்படுகிறது. பக்தர்கள் கூறுகையில், அனுமந்தராயர் கோவில் நூற்றாண்டுகள் பழமையான கோவிலாகும். அறநிலையத் துறையின் கட்டுப்பாட்டில் உள்ள இக்கோவில், நீண்ட காலமாக மீட்கப்படாமல் சிதலமடைந்து புதர் மண்டி கிடந்தது. கோவிலுக்கு சொந்தமாக ஏராளமான நிலங்களும் உள்ளன. கோவில் கண்டுபிடிக்கப்பட்டால் எங்கு நிலங்கள் பறிபோய் விடுமோ என்ற எண்ணத்துடன், சிலர் வெண்டுமென்றே கோவிலை மூடி மறைத்து வந்ததாக கூறப்படுகிறது. தொல்லியல் துறை மற்றும் அறநிலைய துறையின் ஆய்வுக்கு உட்படுத்தி,. அனுமந்தராயர் கோவிலின் வரலாற்றை கண்டறிய வேண்டும். கோவிலின் பழைய ஆவணங்களை கொண்டு, ஆக்கிரமிப்பில் உள்ள நிலங்களை மீட்டெடுக்க வேண்டும். இவ்வாறு அவர்கள் கூறினர்.