உடன்குடி: உடன்குடி தேரியூர் முத்தாரம்மன் கோயில் கொடை விழாவை முன்னிட்டு 1008 திருவிளக்கு பூஜை நடந்தது. தேரியூர் முத்தாரம்மன் கோயில் அப்பகுதியில் பிரசித்தி பெற்றது. இக்கோயில் கொடை திருவிழா மே 15ம் தேதி துவங்கியது. இதையொட்டி இரவு நாட்டில் கனமழை வேண்டி தேரியூர் காமராஜர் நற்பணி மன்றம் சார்பில் 1008 திருவிளக்கு பூஜை நடந்தது. இரவு சிறப்பு பூஜையும், அம்மன் வீதி உலா வருதல் நடந்தது. நேற்று காலை பால்குடம் எடுத்து வருதல், அம்மன் வீதி உலா வருதல், இரவு முளைப்பாரி எடுத்து வருதல், நள்ளிரவு அம்மன் சப்பரத்தில் பவனி வருதல் நடந்தது. மதியம்அம்மன் வீதி உலா வந்து மஞ்­சள் நீராடுதல், மாலை 6:00 மணிக்கு சிறப்பு அபிஷேக அலங்காரத்துடன் பைரவர் பூஜை நடக்கிறது. இரவு 9 மணிக்கு மதுரை முத்து மற்றும் சினிமா பிரபலங்கள் கலந்து கொள்ளும் சிறப்பு பட்டி மன்றம் நடக்கிறது. இரவு 12 மணிக்கு சிறப்பு பூஜையும், அம்மன் வீதி உலா வருதல் நடக்கிறது. நாளை (மே 18ம் தேதி) காலை 7 மணிக்கு கொடை விழா நிறைவு பூஜையும், காலை 8 மணிக்கு பிரசாதம் வழங்குதல், காலை 9 மணிக்கு தேரியூர் பெண்கள் 125 பேர் கலந்து கொள்ளும் கோலப்போட்டியும், இரவு 8:00 மணிக்கு தேரியூர் காமராஜர் நற்பணி மன்றம் சார்பில் நெல்லை சந்திரனின் திரைப்­பட கச்சேரியும் நடக்கிறது. ஏற்பாடுகளை கோயில் தர்மகர்த்தா சிவ நடராஜன், விழா கமிட்டியார் மற்றும் தேரியூர் ஊர்ப்பொது மக்கள் செய்து வருகின்றனர்.