சிங்கம்புணரி: மு.சூரக்குடி கிராமம் எஸ்.கோவில்பட்டி செகுட்டையனார் கோயில், சூரக்குடி சிறை மீட்ட ஐயனார் கோயில் புரவி எடுப்பு திருவிழா நடந்தது. விழாவையொட்டி ஜூன் 23ம் தேதி பிடிமண் கொடுக்கப்பட்டது. 30 க்கும் மேற்பட்ட குலாலர்கள் இணைந்து அரண்மனை புரவிகள் 2, நேர்த்திக்கடன் புரவிகள் 288 செய்தனர். புரவிப் பொட்டலில் இருந்து ஜூலை 6-ஆம் தேதி அனைத்து புரவிகளும் கச்சேரி திடலுக்கு கொண்டு கொண்டுவரப்பட்டன. அங்கு சிறப்பு வழிபாடு நடத்தப்பட்டு பாரம்பரியமான சாமி ஆட்டம் நடந்தது. நேற்று மாலை 5:00 மணிக்கு புரவி ஊர்வலம் புறப்பட்டது. ஒரு அரண்மனை புரவி சிறைமீட்ட அய்யனார் கோயிலுக்கு கொண்டு செல்லப்பட்டது. மற்றொரு அரண்மனை புரவியும் நேர்த்திக்கடன் புரவிகளும் செகுட்டையனார் கோயிலுக்கு ஊர்வலமாக கொண்டு செல்லப்பட்டன. விழாவையொட்டி தங்கக் கவச அலங்காரத்தில் செகுட்டையனார் அருள்பாலித்தார். விழாவில் ஏராளமான பக்தர்கள் பங்கேற்றனர். படைத்தலைவி அம்மன் கோயிலிலும் சிறப்பு வழிபாடு நடத்தப்பட்டது.