சபரிமலை ஐயப்பன் கோயிலில் இன்று காலை நடைபெற்ற நிறை புத்தரிசி பூஜையில் திரளான பக்தர்கள் கலந்து கொண்டனர்.

நாட்டில் வறுமை நீங்கி விவசாயம் செழிக்க வேண்டி எல்லா ஆடி மாதமும் சபரிமலை உள்ளிட்ட அனைத்து கேரள கோயில்களிலும் நிறைப்புத்தரிசி பூஜை நடைபெறுகிறது. வயல்களில் சாகுபடி செய்யப்பட்ட நெற்கதிர்கள் கோயிலில் படைக்கப்பட்டு அது பக்தர்களுக்கு பிரசாதமாக வழங்கப்படுகிறது. இந்த பூஜைக்காக நேற்று மாலை சபரிமலை நடை திறந்தது. இன்று அதிகாலை 5 :00மணிக்கு நடை திறந்ததும் அபிஷேகத்துக்கு பின்னர் 5.30மணிக்கு நிறைப்புத்தரிசி பூஜைக்கான சடங்குகள் தொடங்கியது. கந்திரி கண்டரரு பிரம்மதத்தன் தேவசம்போர்டு வயல்களில் இருந்து கொண்டுவரப்பட்ட நெற்கதிர்களை ஸ்ரீ கோயில் மண்டபத்தில் வைத்துபூஜை நடத்தினார். தொடர்ந்து மேல் சாந்தி ஜெயராமன் நம்பூதிரி மற்றும் பூஜாரிகள் அந்த நெற்கதிர்களை சுமந்து ஸ்ரீ கோயிலுக்குள் கொண்டு சென்றனர். அங்கு தந்திரி கண்டரரு ராஜீவரரு பூஜைகள் நடத்திய பின்னர் அந்த நெற்கதிர்களை பக்தர்களுக்கு பிரசாதமாக வழங்கினார். இந்த பூஜையில் திரளான பக்தர்கள் கலந்து கொண்டனர்.