மயிலாடுதுறை: திருக்கடையூர் கோவிலில் திரைப்பட நடிகர்கள் தியாகராஜன், அவரது மகன் பிரசாந்த் மற்றும் தியாகு ஆகியோர் குடும்பத்தினருடன் சுவாமி தரிசனம் செய்தனர்.

மயிலாடுதுறை மாவட்டம் தரங்கம்பாடி தாலுக்கா திருக்கடையூரில் தருமபுரம் ஆதீனத்திற்கு சொந்தமான அபிராமி அம்பாள் சமேத அமிர்தகடேஸ்வரர் கோவில் அமைந்துள்ளது. தேவாரப் பாடல் பெற்ற இத்தலத்தில் மார்க்கண்டேயருக்காக சிவபெருமான் கால சம்ஹார மூர்த்தியாக எழுந்தருளி எமனை சம்ஹாரம் செய்ததால் இத்தலம் அட்ட வீரட்ட தலங்களில் ஒன்றாக திகழ்ந்து வருகிறது. இக்கோவிலில் ஹோமங்கள் செய்து சுவாமி, அம்பாளை தரிசித்தால் ஆயுள் விருத்தி கிடைக்கும் என்பது ஐதீகம். அதனால் நாள்தோறும் இங்கு ஆயிரக்கணக்கான பக்தர்கள் வந்து சிறப்பு கோமங்கள் செய்து சுவாமி, அம்பாளை வழிபட்டு செல்வது வழக்கம். இத்தகைய சிறப்புமிக்க கோவிலுக்கு நேற்று மாலை திரைப்பட இயக்குனரும், நடிகருமான தியாகராஜன், அவரது மகன் நடிகர் பிரசாந்த் ஆகியோர் குடும்பத்தினருடன் வந்தனர். தொடர்ந்து அவர்கள் கோவிலுக்குள் சென்று கோபூஜை, கஜ பூஜை செய்த பின்னர் அமிர்தகடேஸ்வரர், கால சம்ஹார மூர்த்தி, அபிராமி அம்பாள் சன்னதிகளில் சிறப்பு பூஜைகள் செய்து வழிபாடு நடத்தினர். பூஜைகளை மகேஷ் குருக்கள் தலைமையிலானோர் செய்து வைத்தனர். முன்னதாக நடிகர் தியாகு தனது குடும்பத்தினருடன் கோவிலுக்கு வந்து சாமி தரிசனம் செய்தார்.