சேலம்: சேலத்தில் கோட்டை மாரியம்மன் கோவிலில் கொடிமரம் பிரதிஷ்டை, ஒத்தி வைக்கப்பட்டதால் பக்தர்கள் ஏமாற்றம் அடைந்தனர். சேலம் கோட்டை மாரியம்மன் கோவில் கும்பாபி ேஷகம், வரும், 27ல் நடக்கவுள்ளது. இதற்காக அழைப்பிதழ் அச்சிடப்பட்டு, பக்தர்களுக்கும் வழங்கப்பட்டது. அதில் புது கொடிமரம் நேற்று காலை பிரதிஷ்டை செய்யப்படும் என குறிப்பிடப்பட்டிருந்தது. ஆனால் நேற்று கோவிலில் எந்த நிகழ்ச்சியும் நடக்கவில்லை. இதனால் கோவிலுக்கு வந்த பக்தர்கள் ஏமாற்றத்துடன் திரும்பினர். இதுகுறித்து பா.ஜ., சுற்றுச்சூழல் பாதுகாப்பு பிரிவு மாநில தலைவர் கோபிநாத் கூறியதாவது: கொடிமரம் பிரதிஷ்டையை எதிர்பார்த்து, ஏராளமான பக்தர்கள் கோவிலுக்கு வந்தனர். ஆனால், கொடிமரம் தயார் ஆகாததால், வரும், 18க்கு நிகழ்வு ஒத்தி வைக்கப்பட்டதாக செயல் அலுவலர் தெரிவித்தார். இதை முன்கூட்டி பத்திரிகை மூலம் தெரிவித்திருந்தால், பக்தர்கள் ஏமாற்றத்தை தவிர்த்திருக்கலாம். இனியாவது கும்பாபிஷேக நிகழ்வுகளில் மாற்றம் இருப்பின், கோவில் நிர்வாகம் அறிவிப்பாக வெளியிட வேண்டும். இவ்வாறு அவர் கூறினார்.