திருக்கோவிலூர்; திருக்கோவிலூர், பாலசுப்பிரமணியர் கோவிலில் ஐப்பசி கார்த்திகையை முன்னிட்டு, சுவாமி விபூதி அணிந்து ராஜ அலங்காரத்தில் அருள் படைத்தார். திருக்கோவிலூர் ஆஸ்பிடல் ரோட்டில் உள்ள பழமையான பாலசுப்பிரமணியர் கோவிலில், ஐப்பசி மாத கார்த்திகை மற்றும் மண்டல அபிஷேக விழாவை முன்னிட்டு காலை 6:00 மணிக்கு மூலவர் வள்ளி தேவசேனா சமேத பாலசுப்பிரமணியர் மற்றும் உற்சவமூர்த்திகளுக்கு அபிஷேகம் நடந்தது. மூலவர் பாலசுப்பிரமணியர் விபூதி அணிந்து, வெள்ளியங்கி சாத்தி, ராஜ அலங்காரத்தில் எழுந்தருளி, மகா தீபாராதனை நடந்தது. மாலை 6:00 மணிக்கு லட்சார்ச்சனை, தீபாராதனை, பக்தர்களுக்கு பிரசாதம் வழங்கப்பட்டது. இதில் ஏராளமான பக்தர்கள் கலந்து கொண்டனர். விழாவிற்கான ஏற்பாடுகளை விஸ்வகர்மா சமூகத்தினர் செய்திருந்தனர்.