அன்னூர்; நாகம்மாபுதூர் கருப்பராய சுவாமி கோவில் கும்பாபிஷேகம் வரும் 3ம் தேதி நடக்கிறது. குன்னத்தூராம்பாளையம், மூப்பன்குலத்தாரின் குலதெய்வமான, நாகம்மாபுதூர், பிச்சந்தோட்டத்து கருப்பராய சாமி, கன்னிமார் சாமி திருக்கோவிலில் பல்வேறு திருப்பணிகள் செய்யப்பட்டன. இதையடுத்து கும்பாபிஷேக விழா இன்று காலை 9:00 மணிக்கு நவகிரக ஹோமத்துடன் துவங்குகிறது. மதியம் முளைப்பாரி, தீர்த்த குடம் எடுத்து வருதலும், சுவாமி திருவீதி உலாவும் நடக்கிறது. இரவு முதற்கால வேள்வி பூஜை நடக்கிறது. நாளை காலை இரண்டாம் கால வேள்வி பூஜையும், மாலையில் மூன்றாம் கால வேள்வி பூஜையும், இரவு புதிய விக்கிரகங்கள் பிரதிஷ்டை செய்தலும் நடக்கிறது. வரும் 3ம் தேதி காலை 9:15 மணிக்கு கருப்பராயசாமி மற்றும் கன்னிமார் தெய்வங்களுக்கு புனித நீரூற்றி கும்பாபிஷேகம் செய்யப்படுகிறது. காலை 11:00 மணிக்கு தச தரிசனம், மகா அபிஷேகம், அலங்கார பூஜை நடக்கிறது.