பரமக்குடி: பரமக்குடி, எமனேஸ்வரம் பெருமாள் கோயில்களில் பஞ்சராத்ர தீப விழா நடந்தது.

பரமக்குடியில் உள்ள அனைத்து சிவன், முருகன் உள்ளிட்ட கோயில்களிலும் நவ., 26 அன்று கார்த்திகை தீப திருவிழா நடந்தது. தொடர்ந்து நேற்று இரவு பரமக்குடி சுந்தரராஜ பெருமாள் கோயிலில் கார்த்திகை விழாவையொட்டி, பாஞ்சராத்ர தீப விழா கொண்டாடப்பட்டது. அப்போது பெருமாள் ஏகாந்த சேவையில் ஸ்ரீதேவி, பூதேவி தாயாருடன் தோலுக்கினியான் வாகனத்தில் எழுந்தருளினார். தொடர்ந்து கோயில் முழுவதும் விளக்கு ஏற்றி வைக்கப்பட்டு, ராஜகோபுரங்கள் வண்ண விளக்குகளால் அலங்கரிக்கப்பட்டிருந்தன. பின்னர் இரவு 8:00 மணிக்கு சுவாமி தயாருடன் புறப்பாடாகி கோயில் முன்பு சொக்கப்பனை எரிக்கும் நிகழ்ச்சி நடந்தது. பின்னர் ரத வீதிகளில் வலம் வந்த பெருமாள் கோயிலை அடைந்தார்.

*எமனேஸ்வரம் வரதராஜ பெருமாள் கோயிலில் கார்த்திகை தீப விழாவையொட்டி பெருமாள் பாண்டுரங்கன் அலங்காரத்தில் அருள் பாலித்தார். தொடர்ந்து சுவாமி புறப்பாடாகி கோயில் முன்பு சொக்கப்பனை எரிக்கப்பட்டது. பின்னர் வீதி வலம் வந்த பெருமாளை பக்தர்கள் ஏராளமானோர் தரிசனம் செய்தனர்.