பழநி; பழநி பெரியநாயகியம்மன் கோயிலில் தைப்பூசத் திருவிழாவில் திருஊடல் நிகழ்ச்சி, தெப்பத்திருவிழா நடைபெற்று உற்ஸவம் நிறைவடைந்தது.

பழநி, கிழக்கு ரத வீதியில் உள்ள பெரியநாயகி அம்மன் கோயிலில், தைப்பூச திருவிழா, ஜன.19ல் கொடி ஏற்றத்துடன் துவங்கியது. திருவிழா நாட்களில் காலையில் தந்த பல்லாக்கு, புதுச்சேரி சப்பரத்தில் சுவாமி திருவீதி உலா நடைபெற்றது. தைப்பூச திருவிழா உற்சவத்தில் ஜன.24ல் வள்ளி, தெய்வானை, முத்துக்குமாரசாமி திருக்கல்யாணம் பெரியநாயகி அம்மன் கோயிலில் நடைபெற்றது. இரவு வெள்ளி ரதத்தில் ரத வீதியில் தேரோட்டம் நடைபெற்றது. ஜன.25. முத்துக்குமாரசாமி, வள்ளி, தெய்வானை தேரில் எழுந்தருளி திருத்தேர் வடம் பிடித்தல் நடைபெற்றது. திருத்தேரோட்டம் ரத வீதிகளில் வலம் வந்தது. வெள்ளி ஆட்டுக்கடா, வெள்ளி காமதேனு, வெள்ளி யானை, தங்க குதிரை, தங்கமயில் உள்ளிட்ட வாகனங்களில் சுவாமி புறப்பாடு ரதவீதியில் நடைபெற்றது. ஜன.27 ல் இரவு பெரிய தங்கமயில் வாகனத்தில் சுவாமி எழுந்தருளினார். இன்று (ஜன.28) தைப்பூச திருவிழாவில் பத்தாம் நாள் திருவிழாவான காலை, வள்ளி, முத்துக்குமாரசாமி திருமண வைபவத்தால், தெய்வானை கோபித்துக் கொள்ள, தூதரான விரபாகு சென்று சமாதானம் செய்து, கோயில் கதவை திறக்கும் திருவூடல் நிகழ்ச்சி நடைபெற்றது. திருக்கோயில் தெப்ப குள மண்டபத்தில் சுவாமிக்கு அபிஷேகம், அலங்காரம், தீபாராதனை நடைபெற்றது. வண்ண விளக்குகளால் அலங்கரிக்கப்பட்ட தெப்ப தேரில் சுவாமி எழுந்தருளி தெப்ப உற்ஸவம் நடந்தது.