ஒட்டன்சத்திரம்; பழநி தண்டாயுதபாணி சுவாமி திருக்கோயில் உப கோயிலான ஒட்டன்சத்திரம் அரசப்பபிள்ளைபட்டி குழந்தை வேலப்பர் கோயிலில் கும்பாபிஷேகம் நடந்தது.

முதல் நாள் செவ்வாயன்று நன்மங்கல இசை, கணபதி பூஜை, முதற்கால வேள்வி நடந்தது. இரண்டாம் நாள் புதன் காலை கனி, கிழங்கு, மூலிகை உள்ளிட்ட பல்பொருள் வேள்வி நடந்தது. அன்று மாலை மூன்றாம் கால வேள்வி நடந்தது. பேரொளி வழிபாடு, திருமறை, திருமுறை விண்ணப்பம் திருநீறு, திருவமுது வழங்குதல் நடந்தது. இன்ற காலை நான்காம் கால வேள்வி, திருக்குடங்கள் ஞானத் திருஉலா, மூலவர் விமானம் மற்றும் திருச் சுற்று தெய்வங்கள் விமானங்கள், திருக்குட நன்னீராட்டுதல் நடந்தது. இதனைத் தொடர்ந்து குழந்தை வேலப்பர் மற்றும் தெய்வங்களுக்கு பல்வேறு புண்ணிய நதிகளில் இருந்து கொண்டுவரப்பட்ட புனித நீர் கோயில் கலசங்களில் ஊற்றப்பட்டு கும்பாபிஷேகம் நடந்தது. இதனை தொடர்ந்து திருநீறு, திருவமுது வழங்குதல் நடந்தது. மூலவர் பெருந்திரு நன்னீராட்டு சிறப்பு வழிபாடு நடந்தது. பழநி கோயில் தேவஸ்தானம் சிவஸ்ரீ அமிர்தலிங்க குருக்கள், சிவஸ்ரீ செல்வ சுப்பரமண்ய குருக்கள் கும்பாபிஷேகத்தை நடத்தி வைத்தனர். உணவுத்துறை அமைச்சர் சக்கரபாணி , இணை ஆணையர் பாரதி, உதவி ஆணையர் லட்சுமி, அறங்காவலர் குழு தலைவர் சந்திரமோகன், அறங்காவலர்கள் சுப்பிரமணியன், மணிமாறன், ராஜசேகரன் சத்யா, நகராட்சி தலைவர் திருமலைசாமி, துணைத்தலைவர் வெள்ளைச்சாமி, தலைமை செயற்குழு உறுப்பினர் கண்ணன், மாவட்ட வர்த்தக அணி தலைவர் ஆறுமுகம், தொப்பம்பட்டி ஊராட்சி துணைத் தலைவர் தங்கம் கலந்து கொண்டனர். பக்தர்கள் அனைவருக்கும் பிரசாதம் வழங்கப்பட்டது. இதனைத் தொடர்ந்து அன்னதானம் நடந்தது.