மேட்டுப்பாளையம்; காரமடை  அரங்கநாத சுவாமிகோவிலில் நடைபெறும் மாசி தேர் வைபவத்தில் ஸ்ரீதேவி பூதேவி சமேதராய் அன்னபக்ஷி வாகனத்தில் ரங்கநாதர் எழுந்தருளி பக்தர்களுக்கு அருள்பாலித்தார்.

கோவை மாவட்டத்தில், மிகவும் பிரசித்தி பெற்ற வைணவ ஸ்தலம், காரமடை அரங்கநாதர் கோவில். இக்கோவிலில் மாசிமகத் தேர்த் திருவிழா, ஒவ்வொரு ஆண்டும், வெகு விமர்சையாக நடைபெறும். இந்த ஆண்டு மாசி மகத் தேர்த்திருவிழாவை முன்னிட்டு நேற்று முன்தினம் இரவு, கிராம சாந்தி பூஜை செய்யப்பட்டது. நேற்று காலை 10:00 மணிக்கு (18ம் தேதி) கொடியேற்றத்தை முன்னிட்டு, கொடி மரம் முன்பு, கருடாழ்வாருக்கும், கருடாழ்வார் உருவம் பொறித்த கொடிக்கும் முன்பாக, கோவில் ஸ்தலத்தார்கள், அர்ச்சகர்கள் வேத மந்திரங்கள் முழங்க, சிறப்பு பூஜைகள் செய்யப்பட்டன. விழாவில் தினமும் சுவாமி பல்வேறு வாகனங்களில் வலம் வந்து அருள்பாலிக்க உள்ளார். விழாவில் இன்று ஸ்ரீதேவி பூதேவி சமேதராய் அன்னபக்ஷி வாகனத்தில் ரங்கநாதர் எழுந்தருளி பக்தர்களுக்கு அருள்பாலித்தார். ஏராளமான பக்தர்கள் தரிசனம் செய்தனர். வருகிற, 22ம் தேதி காலை பெட்டத்தம்மன் அழைப்பும், 23ம் தேதி அதிகாலை, 5:30 மணிக்கு திருக்கல்யாண வைபமும் நடைபெற உள்ளது. 24ம் தேதி அதிகாலை, 5:30 மணிக்கு ஸ்ரீதேவி, பூதேவி சமேதராக அரங்கநாத பெருமாள், தேருக்கு எழுந்தருளுகிறார். மாலை, 4:00 மணிக்கு தேர் வடம் பிடிக்கும் நிகழ்ச்சியும், அதை தொடர்ந்து தேரோட்டமும் நடைபெற உள்ளது.