மயிலாடுதுறை; மயிலாடுதுறை மாவட்டம், பொறையார் அருகே  ஒழுகைமங்கலம் கிராமத்தில்  சீதளாபரமேஸ்வரி ஆலயத்தில் பங்குனி பெருந்திரு விழாவை முன்னிட்டு கொடியேற்றம் நிகழ்ச்சி ஞாயிற்றுக்கிழமை நடைபெற்றது.

இக்கோயிலில் ஆண்டுதோறும் பங்குனி திருவிழா சிறப்பாக கொண்டாடப்பட்டு வருகிறது. இந்த ஆண்டு பங்குனித் திருவிழாவை முன்னிட்டு கொடியேற்றம் நிகழ்ச்சி  நடைபெற்றது. அதனை தொடர்ந்த வருகின்ற ஞாயிற்றுக்கிழமை தேர் திருவிழா, உதிரவாய் துடைப்பு உற்சவம், மஞ்சள் நீர் உற்சவம் போன்றவை நடைபெறுகிறது. இதையொட்டி சிறப்பு அலங்காரத்தில் சீதளா பரமேஸ்வரி  அம்மனை  எழுந்தருள செய்து மேளதாளங்கள் முழங்க வீதி உலா காட்சி நடைபெற்றது. அப்போது ஏராளமான பக்தர்கள், வேண்டுதலை நிறைவேற்றும் வகையில் பல்வேறு வகையான மலர்களை எடுத்து சென்றனர். அதனை தொடர்ந்து அம்மனுக்கு பால், தேன், சந்தனம், இளநீர்,மஞ்சள்பொடி, திரவிய பொடி உள்ளிட்ட பொருட்களால் சிறப்பு அபிஷேகம் செய்யப்பட்டு பக்தர்களுக்கு பிரசாதம் வழங்கப்பட்டது. முன்னதாக ஏராளமான பெண் பக்தர்கள் மாவிளக்கு ஏற்றி அம்மனை வழிபட்டனர் இதில் உள்ளூர், வெளியூர் மற்றும் வெளி மாவட்டங்களை சேர்ந்த திரளான பக்தர்கள் கலந்து கொண்டு சாமி வழிபாடு செய்தனர். இதற்கான ஏற்பாடுகளை கோயில் நிர்வாகம் மற்றும் அறங்காவலர் குழுவினர் செய்திருந்தனர்.