நத்தம், நத்தம் அருகே புதுப்பட்டி முத்தாலம்மன் கோவில் திருவிழாவில் கழுகு மரம் ஏறும் நிகழ்ச்சியில் ஏராளமானோர் கலந்துகொண்டு சாமி தரிசனம் செய்தனர். இதையொட்டி கடந்த மார்ச் 20- கரந்த மலை கன்னிமார் தீர்த்தம் அழைத்து வரப்பட்டது. தொடர்ந்து மறுநாள் காப்பு கட்டுதல் நிகழ்ச்சி நடந்தது. பின்னர் நேற்று முன்தினம் இரவு தீவட்டி பரிவாரங்களுடன் வானவேடிக்கைகளுடன் ஊர்வலமாக வந்த அம்மன் மேளதாளம் முழங்க கோவில் முன் உள்ள மந்தைக்கு சென்றது.பின்னர் அங்கு அம்மனுக்கு சிறப்பு அபிஷேகம், அலங்காரம், தீபாராதனைகள் நடந்தது.தொடர்ந்து நேற்று காலையில் பக்தர்கள் பால்குடம்,அக்கினிசட்டி, மாவிளக்கு எடுத்து தங்களது நேர்த்திக்கடன்களை செலுத்தினர். தொடர்ந்து கோவில் முன்பாக எண்ணெய் கழுமரம் ஊன்றப்பட்டு பக்தர்கள் ஏறும் நிகழ்ச்சி நடந்தது. இதில் ஏராளமான இளைஞர்கள் கலந்து கொண்டு போட்டி போட்டு கொண்டு கழுகு மரம் ஏறினர்.பின்னர் நேற்று மாலையில் வர்ணக் குடைகளுடன் பக்தர்கள் புடைசூழ அம்மன் பூஞ்சோலை சென்றது.இதில் ஏராளமான பக்தர்கள் கலந்து கொண்டு தரிசனம் செய்தனர். திருவிழாவிற்கான ஏற்பாடுகளை புதுப்பட்டி-குட்டூர் கிராம பொதுமக்கள் செய்திருந்தனர்.