ஸ்ரீவில்லிபுத்தூர்; ஸ்ரீவில்லிபுத்தூர் பெரிய மாரியம்மன் கோயிலில் பூக்குழி திருவிழாவின் நிறைவு நாளான இன்று தேரோட்டம் வெகு சிறப்புடன் நடந்தது. இதனை முன்னிட்டு இன்று காலை 10:50 மணிக்கு திருத்தேருக்கு பெரிய மாரியம்மன் எழுந்தருளினார். அங்கு அம்மனுக்கு சிறப்பு பூஜைகள் செய்யப்பட்டு 11:00 மணிக்கு தேரினை பக்தர்கள் வடம் பிடித்து இழுத்தனர். ஒரு மணி நேரத்தில் கோயில் வீதிகள் சுற்றி வந்து தேர் நிலையம் அடைந்தது. ஏராளமான பக்தர்கள் மொட்டை போட்டும், மாவிளக்கு எடுத்தும் தங்கள் நேர்த்திக் கடன்களை செலுத்தி அம்மனை தரிசனம் செய்தனர். விழா ஏற்பாடுகளை கோயில் நிர்வாகம் செய்திருந்தது. டி.எஸ்.பி.முகேஷ் ஜெயக்குமார், இன்ஸ்பெக்டர் சங்கர் கண்ணன் தலைமையில் ஏராளமான போலீசார் பாதுகாப்பு பணியில் ஈடுபட்டனர்.