பழநி; பழநி கோயிலில் போகர் ஜெயந்தி விழா போகர் சன்னதியில் நடைபெற்றது.

பழநி கோயில் நவபாஷாண மூலவர் சிலையை உருவாக்கிய போகர் சித்தரின் ஜீவசமாதி சன்னதி மலைக்கோவிலில் உள்ளது. இங்கு போகர் சித்தர் வழிபட்ட தொன்மையான மரகதலிங்கம், புவனேஸ்வரி அம்மன் சிலைகள் உள்ளன. தினமும் இங்கு பூஜைகள் நடை பெற்று வருகின்றன. ஆண்டுதோறும் போகர் ஜெயந்தி விழா வைகாசி மாதம், பரணி நட்சத்திரத்தில் கொண்டாடப்படுகிறது. நீதிமன்ற உத்தரவின்படி, இவ்விழா (ஜீன்.4) இன்று மலைக்கோயிலில் போகர் சன்னதியில் சிறப்பாக கொண்டாடப்பட்டது. இந்த ஆண்டு போகர் ஜெயந்தி விழாவை முன்னிட்டு உச்சிகால பூஜை நேரத்தில் போகர் சித்தர் வழிபட்ட, புவனேஸ்வரி அம்மன், மரகதலிங்கத்திற்கு பழங்கள் கங்கைநீர், பன்னீர், சந்தனம், விபூதி உள்ளிட்ட 16 வகையான பொருட்களால் சிறப்பு அபிஷேகம் நடைபெற்றது. அதன் பின் அலங்காரம் செய்யப்பட்டு சிறப்பு தீபாராதனை பூஜைகள் நடைபெற்றன. புலிப்பாணி ஆசிரமத்தில் அன்னதானம் நடைபெற்றது. விழாவில் புலிப்பாணி பாத்திர சுவாமிகள் மற்றும் வெளி மாநில,மாவட்ட, உள்ளூர் பக்தர்கள் பலர் கலந்து கொண்டனர்.