மேட்டுப்பாளையம்; மேட்டுப்பாளையம் அருகே விநாயகர் கோவிலிலும், சிறுமுகையில் ஐயப்பன் கோவிலிலும் கும்பாபிஷேகம் நடைபெற்றது.

மேட்டுப்பாளையம் அன்னூர் சாலையில், இம்மானுவேல் நகர் செல்வபுரத்தில், செல்வ விநாயகர் மற்றும் செல்வ மாரியம்மன் ஆகிய கோவில்கள் உள்ளன. இக்கோவிலில் திருப்பணிகள் நடைபெற்றன. கும்பாபிஷேகம் விழா நேற்று காலை மகா கணபதி ஹோமத்துடன், கோ பூஜை, தீபாராதனையுடன் துவங்கியது. அதைத் தொடர்ந்து விநாயகர் வழிபாடும், வாஸ்து சாந்தி பூஜையும், முதல் மற்றும் இரண்டாம் கால யாக பூஜைகள் நடந்தன. இன்று காலை, 9:00 மணிக்கு, யாகசாலையில் இருந்து தீர்த்த கலசங்கள் ஊர்வலமாக எடுத்து வந்து, கோபுர கலசத்தின் மீதும், விநாயகர், அம்மன் சுவாமிகள் மீதும் புனித நீர் ஊற்றி கும்பாபிஷேகம் நடைபெற்றது. அதைத்தொடர்ந்து அபிஷேகம், அலங்கார பூஜையை அடுத்து, மகா தீபாராதனையும் நடந்தது. விழாவில் ஏராளமான பக்தர்கள் பங்கேற்றனர். திருப்பூர் திருமுருகன்பூண்டி திருமுருகநாத சுவாமி கோவில் அர்ச்சகர் பாலசுப்ரமணிய சிவாச்சாரியார், யாக வேள்வி பூஜைகளையும், கும்பாபிஷேகத்தையும் செய்தார். இதற்கான ஏற்பாடுகளை விழா கமிட்டியினர் செய்திருந்தனர்.

சிறுமுகை எலகம்பாளையத்தில், கீழ் சபரி என்னும் ஐயப்பன் கோவில் உள்ளது. இக்கோவிலில் திருப்பணிகள் நடைபெற்றன. கும்பாபிஷேகம் விழாவில், எலகம்பாளையம் மகாசக்தி மாரியம்மன் கோவிலில் இருந்து, புனித நீர் அடங்கிய தீர்த்த குடங்களை, ஐயப்பன் கோவிலுக்கு மேளதாளம் முழங்க, ஊர்வலமாக எடுத்து வந்தனர். அதைத் தொடர்ந்து கணபதி ஹோமம், வாஸ்து ஹோமம், வாஸ்து கலசம், அஸ்த்ர கலசம் ஆகிய பூஜைகள் நடந்தன. இன்று காலை திரவிய கலச பூஜையும், தேவர்களுக்கு அபிஷேகமும் நடைபெற்றது. அதை தொடர்ந்து, 9:00 மணிக்கு கணபதி, முருகன், சிவலிங்கம், மகாவிஷ்ணு, விஷ்ணு துர்கா, நவகிரகம், நாகராஜா, கருப்பண்ணன் ஆகிய சுவாமிகளுக்கும், விமான கலசத்திற்கும் புனித நீர் ஊற்றி கும்பாபிஷேகம் நடைபெற்றது. அதைத் தொடர்ந்து, 10:30 மணிக்கு, ஐயப்பன் சுவாமிக்கு பஞ்ச வாத்தியம் முழங்க, மகா கும்பாபிஷேகம் நடைபெற்றது. பூத பலி தீபாராதனையும், மதியம் உச்சி பூஜையும் நடந்தது. விழா ஏற்பாடுகளை ஐயப்பன் கோவில் திருப்பணிக் குழுவினர், ஊர் பொதுமக்கள் செய்திருந்தனர்.