அவிநாசி; அவிநாசி ஸ்ரீகருணாம்பிகை உடனமர் லிங்கேஸ்வரர் கோவிலில் உள்ள கருணாம்பிகை அம்மன் கலையரங்கத்தில்,தம்பிரான் தோழர் சுந்தரமூர்த்தி நாயனார் மற்றும் சேரமான் பெருமான் 91வது குருபூஜை பெருவிழா வெகு விமர்சையாக நடைபெற்றது.

ஆடி மாதம், சுவாதி நட்சத்திரத்தில் வரும் நாளை குருபூஜை தினமாக கொண்டாடப்பட்டு வருகிறது. இதனை முன்னிட்டு அவிநாசி பெருங்கருணை நாயகி உடனமர் அவிநாசி லிங்கேஸ்வரர் கோவிலில் தம்பிரான் தோழர் சுந்தரமூர்த்தி நாயனார் மற்றும் சேரமான் பெருமான் நாயனார் குருபூஜை பெருவிழா நடைபெற்றது. இதில், சுந்தரமூர்த்தி சுவாமிகள் அருளிய ஏழாம் திருமுறை மற்றும் சேக்கிழார் பெருமான் அருளிய பெரிய புராண வரலாற்றை முறைப்படி பண்ணொன்ற முற்றும் ஓதுதல் முறையில் திருமுறை கலாநிதி கரூர் குமாரசாமிநாத தேசிகர் தலைமையில், ஓதுவ மூர்த்திகள் கலந்து கொண்டு பாராயணம் செய்தனர். முன்னதாக செல்வ விநாயகர், பாதிரி மரத்தம்மன், ஸ்வாமி, அம்பாள், சுப்ரமணியர், நால்வர் பெருமக்கள் மற்றும் 63 நாயன்மார்களுக்கு சிறப்பு அபிஷேகம், அலங்காரம் மற்றும் தீபாராதனை நடைபெற்றது. அதனைத் தொடர்ந்து ஸ்வாமி அம்பாளுடன் சுந்தரமூர்த்தி நாயனார் மற்றும் சேரமான் பெருமான் நாயனார் உடன் நான்கு ரத வீதியிலும் திருவீதி உலா நடைபெற்றது.

அதன் பின்னர் மாலையில் வெள்ளை யானை வாகனத்தில் சுந்தரர், குதிரை வாகனத்தில் சேரமான் பெருமான் நாயனார் திருவீதி வலம் வந்து இறைவனடி பற்றுதல் நிகழ்ச்சி நடைபெற்றது. இந்நிகழ்ச்சியில் ஏராளமான பக்த பெருமக்கள் கலந்து கொண்டு காலை ஏழு மணி முதல் மாலை 7 மணி வரை ஓதுவா மூர்த்திகளுடன் பாராயணம் செய்தனர். 91வது குருபூஜை பெருவிழாவை முன்னிட்டு பக்தர்களுக்கு அன்னதானம் வழங்கப்பட்டது. விழாவிற்கான ஏற்பாடுகளை கோவில் செயல் அலுவலர் பெரிய மருது பாண்டியன் செய்தார்.