உத்திரமேரூர்; உத்திரமேரூரில், எல்.எண்டத்தூர் சாலையில் நூக்காலம்மன் கோவில் உள்ளது. இக்கோவிலில், நடப்பாண்டிற்கான ஆடி மாதம் தீமிதி திருவிழா நேற்று நடந்தது. காலையில், அம்மனுக்கு சிறப்பு அபிஷேகம் மற்றும் தீபாராதனையை தொடர்ந்து, நங்கையர் குளத்தில் இருந்து ஜலம் திரட்டி பஜார் வீதி வழியாக கோவில் வந்தடைந்தத‌து. அதை தொடர்ந்து, மாலை 6:00 மணிக்கு கோவில் எதிரில் அக்னி குண்டம் அமைத்து, தீமிதி விழா நடந்தது. இதில், விரதம் இருந்த ஏராளமான பக்தர்கள் தீ மிதித்து அம்மனுக்கு நேர்த்திக்கடன் செலுத்தினர். விழாவில், உத்திரமேரூர் மற்றும் சுற்றுவட்டார பகுதி பக்தர்கள் பங்கேற்று தீபம் ஏற்றி வழிபட்டனர்.