மானாமதுரை; மானாமதுரை அருகே மேலப்பிடாவூரில் நடைபெற்ற வெள்ளாரப்பன்(எ)முத்தையா அய்யனார் கோயில் கும்பாபிஷேக விழாவில் ஆயிரக்கணக்கான பக்தர்கள் கலந்து கொண்டு சுவாமி தரிசனம் செய்தனர்.

மேலப்பிடாவூர் கிராமத்தில் உள்ள பூர்ணா தேவி,புஷ்கலா தேவி சமேத வெள்ளாரப்பன் (எ)முத்தையா அய்யனார் கோயிலில் கருங்கல்லில் கும்பாபிஷேக பணிகள் மற்றும் மராமத்து பணிகள் நடைபெற்று வந்து முடிவடைந்ததை தொடர்ந்து கடந்த 6ம் தேதி கோயில் வளாகத்தில் அமைக்கப்பட்டிருந்த யாகசாலையில் கணபதி ஹோமத்துடன் யாகசாலை பூஜைகள் துவங்கியது.இதனைத் தொடர்ந்து கடந்த 2நாட்களாக 4 கால யாகசாலை பூஜைகள் நடைபெற்று வந்தன.நேற்று அதிகாலை பூஜைகள் முடிவு பெற்று பூர்ணாஹூதி நடைபெற்று யாகசாலையிலிருந்து புனித நீர் அடங்கிய கடங்களை செல்லப்பா குருக்கள் தலைமையிலான ஏராளமான சிவாச்சாரியார்கள் மேள,தாளங்கள் முழங்க ஊர்வலமாக கோயிலை சுற்றி வலம் வந்து ராஜகோபுரத்திற்கும், பரிவார தெய்வங்களின் கோபுரங்களுக்கும் புனித நீரை கொண்டு சென்றனர்.பின்னர் காலை 8: 20 மணிக்கு புனித நீரை கோபுர கலசங்களின் மீது ஊற்றி கும்பாபிஷேகத்தை நடத்தி வைத்தனர்.இதையடுத்து தீபாராதனை நடைபெற்றது. பின்னர் சுவாமிகளுக்கு அபிஷேக,ஆராதனைகள்,தீபாராதனைகள் நடைபெற்று முடிந்தவுடன் கோயில் வளாகத்தில் அன்னதானம் நடைபெற்றது. இரவு கோயில் முன்பாக கலை நிகழ்ச்சிகள் நடைபெற்றன.விழாவிற்கான ஏற்பாடுகளை மேலப்பிடாவூர்,குலக்கட்டப்பட்டி கிராம பொதுமக்கள் மற்றும் குலதெய்வ வழிபாட்டு மக்கள் செய்திருந்தனர்.