கமுதி; கமுதி அருகே முத்தாலங்குளம் கிராமத்தில் நல்லமழை பெய்து விவசாயம் செழிக்க வேண்டி நிறைகுளத்து அய்யனார் கோயில் குதிரைஎடுப்பு விழா நடந்தது. கமுதி கண்ணார்பட்டியில் கடந்த ஒருமாதத்திற்கு முன் பிடிமண் வழங்கப்பட்டது.பக்தர்கள் காப்புக்கட்டி விரதம் இருந்தனர். தினமும் அய்யனாருக்கு பூஜை நடந்தது. கமுதி கண்ணார்பட்டியில் இருந்து மண்ணால் செய்த கருப்பணசாமி, பைரவர்,அம்மன் ,குதிரைகள் உட்பட 100க்கும் மேற்பட்ட தவளும் பிள்ளைகள் ஊர்வலமாக முத்தாலங்குளம் கிராமத்திற்கு கொண்டு சென்றனர். விநாயகர் கோயிலில் வைத்து கடந்தாண்டு விளைந்த தானியங்கள் வைத்து பூஜை, கண் திறப்பு செய்யப்பட்டது. கிராமத்தின் முக்கிய வீதியில் உலா வந்து நிறைகுளத்து அய்யனார் கோயிலில் சிறப்புபூஜை செய்தனர்.பொங்கல் வைத்து நேர்த்திக்கடன் செலுத்தினர். முளைக்கொட்டு திண்ணையில் பெண்கள் கும்மி அடித்தும், ஆண்கள் ஒயிலாட்டம் அடியும் வந்தனர். பின்பு முளைப்பாரி தூக்கி ஊர்வலமாக சென்று ஊருணியில் கரைத்தனர்.ஏற்பாடுகளை முத்தாலங்குளம் மக்கள், இளைஞர்கள் செய்தனர்.