ஸ்ரீரங்கம்: ஸ்ரீரங்கம் ரெங்கநாதர் கோவிலில் நம்பெருமாள் கைசிக ஏகாதசி விழா சிறப்பாக நடைபெற்றது. புதிய வைர கீரீடத்துடன் நம்பெருமாள் சிறப்பு ஆஸ்தான சேவை சாதித்தார்.

108 வைணவத்திருத்தலங்களில் முதன்மையானதும், பூலோக வைகுண்டம் என்ற சிறப்புக்குரியதுமான ஸ்ரீரங்கம் ரெங்கநாதர் கோவிலில் ஆண்டுதோறும் கார்த்திகை மாதம் ஏகாதசி தினத்தன்று கைசிக ஏகாதசி விழா நடைபெறும். இந்தாண்டு கைசிக ஏகாதசி விழா இன்று நடைபெற்றது. இதனையொட்டி முதல் புறப்பாடாக, உற்சவர் நம்பெருமாள்  மூலஸ்தானத்திலிருந்து காலை 10 மணிக்கு புறப்பட்டு 10.30 மணிக்கு  சந்தன மண்டபத்துக்கு வந்து சேர்ந்தார். அங்கு 11.30 மணி முதல் 1.30 மணிவரை நம்பெருமாளுக்கு திருமஞ்சனம் நடைபெற்றது. பின்னர் சந்தன மண்டபத்திலிருந்து நம்பெருமாள் மாலை புறப்பட்டு மூலஸ்தானம் சென்றடைகிறார்.  2வது புறப்பாடாக நம்பெருமாள் மூலஸ்தானத்திலிருந்து இரவு புறப்பட்டு 9 மணிக்கு அர்ச்சுன மண்டபத்திற்கு வந்து சேர்வார். அங்கு நம்பெருமாளுக்கு இரவு 365 வஸ்திரங்களும், 365 தாம்பூலங்களும், அரையர் சேவையுடன் 365 கற்பூர ஆரத்தியும் நடைபெறும். கைசிக ஏகாதசியை முன்னிட்டு இன்று இரவு முழுவதும் விடிய, விடிய பக்தர்கள் நம்பெருமாளை தரிசனம் செய்வார்கள்.