சென்னை: கிறிஸ்துமஸ் விழாவை முன்னிட்டு, நள்ளிரவு முதல் தேவாலயங்களில் சிறப்பு பிரார்த்தனை, திருப்பலி, ஆராதனை நடந்தது. இதில் திரளான கிறிஸ்தவர்கள் பங்கேற்றனர். கிறிஸ்துமஸ் விழா இன்று (25ம் தேதி) கொண்டாடப்படுகிறது. கிறிஸ்துமஸ் பண்டிகைகையையொட்டி நாடு முழுவதும் கிறிஸ்தவர்கள் கொண்டாட்டத்தில் ஈடுபட்டுள்ளனர். இதையொட்டி, தமிழகத்தில் உள்ள அனைத்து தேவாலயங்களிலும் நள்ளிரவு, சிறப்பு பிரார்த்தனை நடந்தது. இதில் கிறிஸ்தவர்கள் பங்கேற்று, கிறிஸ்துமஸை கொண்டாடினர். கிஸ்துமஸை ஒட்டி, தமிழகம் முழுவதும் பலத்த போலீஸ் பாதுகாப்புக்கு ஏற்பாடு செய்யப்பட்டது.

முதல்வர் வாழ்த்து: கிறிஸ்துமஸ் பண்டிகையையொட்டி, முதல்வர் ஸ்டாலின் தனது வாழ்த்து செய்தியில், இயேசு காட்டிய அன்பின் பாதையை பின்பற்றும் கிறிஸ்தவர்கள் அனைவருக்கும் கிறிஸ்துமஸ் வாழ்த்துக்கள், அனைத்து மதத்தவரும் சம உரிமையோடு வாழும் மாநிலமாக தமிழ்நாடு திகழ தமிழக அரசு பாடுபடும் என வாழ்த்து தெரிவித்துள்ளார்.

* விழுப்புரம் கிழக்கு பாண்டி ரோட்டில் அமைந்துள்ள கிறிஸ்து அரசர் ஆலயத்தில் கிறிஸ்மஸ் சிறப்பு கூட்டுத் திருப்பலி நடந்தது.

* இருதய ஆண்டவர் ஆலயத்தில் நேற்று நள்ளிரவு நடந்த கிறிஸ்துமஸ் விழாவில்  புதுச்சேரி கடலூர் உயர் மறைமாநில ஆவணக்காப்பாளர் பாதிரியார் மெல்கிசேதேக்  குழந்தை ஏசு சொருபத்தை குடிலில் வைக்க கையில் ஏந்தி வந்தார்.

* புதுச்சேரி கப்ஸ் பேராலயத்தில் கிறிஸ்துமஸ் பிறப்பையொட்டி பங்குத்தந்தை ஜான் பீட்டர் குழந்தை இயேசு சொருபத்தை குடிலில் வைத்தார். சர்ச்சில் சிறப்பு பிரார்த்தனை நடந்தது.