பரமக்குடி; பரமக்குடி முத்தாலபரமேஸ்வரி அம்மன் கோயில் பங்குனி விழா ஏப்.,3 கொடியேற்றத்துடன் துவங்குகிறது. கோயிலில் ஒவ்வொரு ஆண்டும் பங்குனி திருவிழா விமரிசையாக நடக்கிறது. இதன் தொடக்கமாக நாளை நகரில் 50க்கும் மேற்பட்ட இடங்களில் பூத்தட்டுகளை வைத்து அம்மனுக்கு பூச்சொரிதல் விழா நடக்கிறது. ஏப்.,2 இரவு காப்பு கட்டப்பட்டு, மறுநாள் காலை கொடியேற்றம், இரவு பூதகி வாகனத்தில் அம்மன் வீதி உலா வருகிறார். தொடர்ந்து ஏப்.,6 வண்டி மாகாளி உற்சவம், வெள்ளி சிங்கம், அன்னம், ரிஷபம், யானை, கிளி, காமதேனு வாகனங்களில் வீதி உலா வருவார். 8ம் நாள் இரவு குதிரை வாகனத்தில் ராஜாங்க திருக்கோலத்தில் அருள் பாலிப்பார். ஏப்.,11 காலை தொடங்கி அக்னி சட்டி ஏந்தி பக்தர்கள் நேர்த்திக்கடன் செலுத்துவர். இரவு 8:10 மணிக்கு அம்பாள் சர்வ அலங்காரத்துடன் மின் தீப அலங்கார தேரில் நான்கு மாட வீதிகளில் உலா வருவார். மறுநாள் அதிகாலை 5:00 மணிக்கு பூ பல்லக்கில் கள்ளர் திருக்கோலத்தில் அம்பாள் வைகை ஆற்றில் காட்சியளிப்பார். ஏப்.,12 இரவு கொடி இறக்கப்பட்டு, ஏப்.,13 அதிகாலை 4:00 மணி தொடங்கி பல ஆயிரம் பக்தர்கள் வைகை ஆற்றில் இருந்து பால் குடங்களை சுமந்து நேர்த்திக்கடன் செலுத்துவர். அன்று காலை 11:00 மணிக்கு பாலாபிஷேகம், இரவு பூ பல்லக்கில் சயன கோலத்தில் அம்பாள் வீதி உலா வருவார். ஏற்பாடுகளை மீனாட்சி சுந்தரேஸ்வரர், முத்தாலம்மன் கோயில் தேவஸ்தான டிரஷ்டிகள், ஆயிரவைசிய சபையினர் செய்கின்றனர்.