அவிநாசி; அவிநாசி குருந்தங்காடு முனியப்ப சாமி கோவிலில், மஹா கும்பாபிஷேக விழா நடைபெற்றது. அவிநாசியில் மடத்துப்பாளையம் குருந்தங்காடு பகுதியில் எழுந்தருளி அருள்பாளித்து வரும் ஸ்ரீ முனியப்ப சாமி கோவிலில் இன்று காலை மஹா கும்பாபிஷேக விழா நடைபெற்றது. முன்னதாக கும்பாபிஷேகத்தை முன்னிட்டு நேற்று நூற்றுக்கும் மேற்பட்டோர் அவிநாசி லிங்கேஸ்வரர் கோவிலில் இருந்து தீர்த்தகுடம் எடுத்து ஊர்வலமாக சென்றனர். இன்று காலை விநாயகர் வழிபாடு, பஞ்சகவ்யம்,வேதிகார்ச்சனை,யாத்ரா தானம், கலசங்கள் புறப்பாடு ஆகியவை நடைபெற்று முனியப்ப சாமிக்கு மஹா கும்பாபிஷேகம் நடைபெற்றது. கும்பாபிஷேகத்தை முன்னிட்டு கோவில் விழா கமிட்டி சார்பில் பக்தர்களுக்கு அன்னதானம் வழங்கப்பட்டது.