அயோத்தி; உத்தர பிரதேசத்தின் அயோத்தியில் உள்ள ராமர் கோவில், கடந்த நிதியாண்டில் 327 கோடி ரூபாயை வருவாயாக ஈட்டியுள்ளது. இதையடுத்து, நம் நாட்டில் உள்ள பணக்கார கோவில்களின் வரிசையில் நான்காம் இடத்தை பிடித்துள்ளது.

உ.பி.,யின் அயோத்தியில், ஸ்ரீ ராமஜென்மபூமி அறக்கட்டளை சார்பில் ராமருக்கு பிரமாண்ட கோவில் கட்டப்பட்டுள்ளது. கடந்தாண்டு ஜனவரியில் நடந்த விழாவில், பால ராமர் விக்ரகம் பிரதிஷ்டை செய்யப் பட்டது. இந்தியா மட்டுமின்றி உலகின் பல்வேறு பகுதிகளில் இருந்து ஏராளமான பக்தர்கள் நாள்தோறும் பால ராமரை தரிசித்து வருகின்றனர். இந்நிலையில், 2024 – 25ம் நிதியாண்டில் மட்டும், அயோத்தி ராமர் கோவில் 327.07 கோடி ரூபாய் வருவாய் ஈட்டியுள்ளது. இதில், நன்கொடையாக மட்டும் 157 கோடி ரூபாய் பெறப்பட்டுள்ளது. உண்டியல் வருவாய், வங்கியில் செலுத்தப்பட்ட தொகைக்கு கிடைத்த வட்டி உள்ளிட்டவை இதில் அடங்கும். இதையடுத்து, நாட்டில் அதிக வருவாய் ஈட்டும் கோவில்களின் பட்டியலில் அயோத்தி ராமர் கோவில் இடம்பெற்றுள்ளது.

இது குறித்து ஸ்ரீ ராமஜென்ம பூமி அறக்கட்டளையைச் சேர்ந்த நிர்வாகி ஒருவர் கூறியதாவது: ராமர் கோவிலுக்கு நாள்தோறும் 70,000 – 80,000 பக்தர்கள் வருகின்றனர். திருவிழா காலங்களில், இது மூன்று மடங்காக உயரும். நடப்பு நிதியாண்டில், கடந்த மாதம் வரை, 104.96 கோடி ரூபாய் ராமர் கோவிலுக்கு வருவாயாக கிடைத்துள்ளது. இதில், 31.22 கோடி ரூபாய் நன்கொடையாகவும், 20.86 கோடி ரூபாய் உண்டியல் காணிக்கையாகவும் கிடைத்துள்ளது. வருடாந்திர வருவாய் அடிப்படையில், நம் நாட்டில் உள்ள பணக்கார கோவில்களில் அயோத்தி ராமர் கோவில் நான்காம் இடத்தை பிடித்துள்ளது. இவ்வாறு அவர் கூறினார்.