அவிநாசி; சேவூர் ஸ்ரீ கல்யாண வெங்கட்ரமண சுவாமி கோவிலில், நாளை நடைபெறும் கும்பாபிஷேகத்தை முன்னிட்டு ஆயிரத்துக்கும் மேற்பட்ட பக்தர்கள் கலந்து கொண்ட தீர்த்த குட ஊர்வலம் நடைபெற்றது

சேவூரில், 1300 வருடங்களுக்கும் மேலான பழமை வாய்ந்ததாக போற்றப்படும் ஸ்ரீ கல்யாண வெங்கட்ரமண பெருமாள் கோவில் உள்ளது. கிபி 12-ம் நூற்றாண்டுக்கு முன்பு,கொங்குச் சோழர்களால் இக்கோவில் கட்டுமானம் கட்டப்பட்டதாக வரலாற்று ஆய்வுகள் கூறுகின்றது. இச்சிறப்பு மிக்க வைணவ தலமாக விளங்கும் அழகு ராய விண்ணகரம் என அழைக்கப்படும் ஸ்ரீ கல்யாண வெங்கட்ரமண சுவாமி கோவிலில் வரும் நாளை மகா கும்பாபிஷேக விழா காலை 7:45 மணிக்கு மேல் 8.45 மணிக்குள் நடைபெறுகிறது. இதனை முன்னிட்டு நேற்று சேவூர் வாலீஸ்வரர் கோவிலில் இருந்து ஆயிரத்துக்கும் மேற்பட்ட பக்தர்கள் தீர்த்த குடம் எடுத்து ஊர்வலமாக வடக்கு வீதி, சந்தைப் பாளையம், கோபி ரோடு, ராஜவீதி, மாரியம்மன் கோவில் வீதி மற்றும் சேவூர் கைகாட்டி ரவுண்டானா வழியாக சென்று கோவிலை அடைந்தனர். கும்பாபிஷேகத்திற்காக தீர்த்த குடம் சுமந்த பக்தர்களுக்கு கோவில் விழா கமிட்டி சார்பில் அன்னதானம் வழங்கப்பட்டது.