பெ.நா.பாளையம்; பெரியநாயக்கன்பாளையத்தில் உள்ள கரிவரதராஜ பெருமாள் திருக்கோவிலில் கும்பாபிஷேக விழா துவங்கியது.

பெரியநாயக்கன்பாளையத்தில் பூமி நீளா பெருந்தேவி நாயகி சமேத கரிவரதராஜ பெருமாள் திருக்கோவில் கும்பாபிஷேக விழா நடத்த ஏற்பாடுகள் செய்யப்பட்டுள்ளன. இதையொட்டி கடந்த சில மாதங்களாக கோவிலை சுற்றி கற்களை பதித்தல், தங்க கொடிமரம், அரங்க மண்டபத்துக்கு டைல்ஸ் பதித்தல், கோபுரங்களுக்கு வர்ணம் தீட்டுதல் உள்ளிட்ட பல்வேறு புனரமைப்பு அமைப்பு பணிகள் நடந்து வந்தன. இவை நிறைவு பெற்றதை ஒட்டி கோயிலின் கும்பாபிஷேக விழா நிகழ்ச்சிகள், சாந்தி ஹோமத்துடன் தொடங்கியது. தொடர்ந்து முதல் கால வேள்வி, மங்கல இசை, குருதட்சனை கொடுத்தல், புனித நீர் தெளித்தல், கங்கன நூல் கட்டுதல், ஆராதனை புற்றுமண் எடுத்தல், யாகசாலை பிரவேசம், வேத பிரபந்த பாராயணம், இதிகாச புராணங்கள் பாராயணம் செய்தல் மற்றும் ஆரத்தி ஆகிய நிகழ்ச்சிகள் நடந்தன. நேற்று காலை, 8.00 மணி அளவில் இரண்டாம் கால வேள்வி, மதியம்,1.00 மணி அளவில் கோபுர கலசங்கள், விமானம் ஆகியவற்றுக்கு பூஜை செய்தல், மாலை மூன்றாம் கால வேள்வி பூஜை நடந்தன. இன்று நான்காம் கால வேள்வி பூஜை நடக்கிறது. முக்கிய நிகழ்ச்சியான கும்பாபிஷேக விழா நாளை ஞாயிற்றுக்கிழமை காலை, 5.00 மணிக்கு ஆறாம் கால வேள்வியோடு தொடங்குகிறது. காலை, 8.00 மணிக்கு மூலவர் கோபுரம், ராஜகோபுரம், ஆண்டாள் திருக்கோவில் கோபுரம் ஆகியவற்றிற்கு புனித நீர் ஊற்றி கும்பாபிஷேகம் நடக்கிறது. தொடர்ந்து, அன்னதானம், பெருமாள் திருக்கல்யாணம் நடக்கிறது.