தஞ்சாவூர்: தஞ்சாவூர் மாவட்டம், கும்பகோணம் ஆதிகும்பேஸ்வரர் கோவிலில், பழங்கால கல் நாதஸ்வரம் பெட்டகத்தில் பாதுகாப்பட்டு வருகிறது. சாதாரண மர நாதஸ்வரம், 600 கிராம் எடையில் இருக்கும். ஆனால், இது அதைவிட ஆறு மடங்கில், 3.600 கிலோ எடை, 2.5 அடி நீளம் கொண்டது. இந்த நாதஸ்வரத்தில் 2 அங்குல உயரமுள்ள திமிரி சீவாளி உள்ளது.

வட இந்திய குழல் இசைக்கருவியான ஷெனாய் போன்ற தோற்றத்தை கொண்ட இந்த கல் நாதஸ்வரத்தின் உலவுப்பகுதியானது, மூன்று உறுதியான தனித்தனி பாகங்களாக செய்யப்பட்டு, வெண்கலப்பூண் மூலம் இணைக்கப்பட்டவை. மரத்தால் செய்யப்படும் நாதஸ்வரங்களில் ஏழு ஸ்வரங்கள் இருக்கும். கல் நாதஸ்வரத்தில் ஆறு ஸ்வரங்கள் மட்டுமே இருக்கும். எனவே, சண்முகப்ரியா, கல்யாணி போன்ற பிரதிமத்திம ராகங்களை மட்டுமே வாசிக்க முடியும். சங்கராபரணம், கரகரப் பிரியா, தோடி போன்ற சுத்த மத்திம ராகங்களை இந்த நாதஸ்வரத்தில் வாசிக்க முடியாது. மறைந்த நாதஸ்வர மேதை மன்னார்குடி பக்கிரியா பிள்ளையால், 60 ஆண்டுகளுக்கு முன்பு ஆதிகும்பேஸ்வரர் கோவிலில் நடைபெறும் முக்கிய விழாக்களில் இந்த கல் நாதஸ்வரம் வாசிக்கப்பட்டது. பிறகு, கோவில் நாதஸ்வர வித்வானான குஞ்சுதபாதம் பிள்ளையால் 30 ஆண்டுகளுக்கு மேல் வாசிக்கப்பட்டு வந்தது. அதன்பிறகு, சுவாமிநாதன் கல் நாதஸ்வரத்தை வாசித்தார். இறுதியாக கல்நாதஸ்வரம், 2017, செப்., 30 அன்று, சுவாமிநாதனால், ஒரு மணி நேரத்தில் நான்கு கீர்த்தனைகள் இசைக்கப்பட்டன. இந்நிலையில் எட்டு ஆண்டுகளுக்கு நேற்று ஆதி கும்பேஸ்வரர் கோவில் கும்பாபிஷேகம் வரும் டிச., 1ம் தேதி நடைபெறும் நிலையில், மூன்றாம் கால யாகசாலை பூஜையின் போது, சுவாமிநாதனின் தம்பி மகன் தமிழரசன், மாலை 5:37 மணிக்கு துவங்கி 6:03 மணி வரை, 26 நிமிடங்கள், அமிர்தவர்சினி, அம்சநாதம், சாரங்க, சரஸ்வதி ஆகிய நான்கு ராகங்களை கல் நாதஸ்வரத்தில் இசைத்தார். பிறகு அவர், கோவில் செயல் அலுவலர் முருகனிடம் பத்திரமாக ஒப்படைத்தார்.