ஆண்டிபட்டி: ஜம்புலிபுத்தூர் கதலி நரசிங்கப்பெருமாள் கோயில், புதியதேர் செய்யும் பணியை பிப்ரவரி இறுதிக்குள் முடித்து வெள்ளோட்டமிட திட்டமிடப்பட்டுள்ளதாக, கோயில் நிர்வாகம் தெரிவித்துள்ளது.ஜம்புலிபுத்தார் கதலி நரசிங்கப்பெருமாள் கோயில் புதியதேர் செய்யும் பணி,17 லட்சம் ரூபாய் செலவில் 2005ல் துவங்கியது. மதுரை மீனாட்சி கோயில் மூலம் நிதி ஒதுக்கப்பட்டு நடந்த பணிகளில், தொய்வு ஏற்பட்டதால் சில மாதங்கள் கிடப்பில் போடப்பட்டது. பின் மீண்டும் தேர் செய்யும் பணிகள் முடுக்கி விடப்பட்டது. கடந்த ஆறு மாதங்களாக தேர் செய்யும் பணிகள் தொடர்ந்து நடந்து வருகிறது. புதிய தேர் 27 அடி உயரம், இரும்பு அச்சுக்கு மேல் ஐந்து அலங்கார அடுக்குகள் கொண்டதாகவும் வடிவமைக்கப்பட்டு வருகிறது. பிரம்மா அடுக்கான முதல் அடுக்கில் கதலிநரசிங்கப்பெருமாள், சிவன், விநாயகர், முருகன், லட்சுமி, சரஸ்வதி தெய்வங்களின் சிற்பங்களும், கோண அடுக்கான 2ம் அடுக்கில் சிற்ப வேலைகளும், 3ம் அடுக்கில் பெருமாளின் அவதாரம், 4ம் அடுக்கில் தேவாசனம் மற்றும் ஆழ்வார் அவதாரம், 5ம் அடுக்கில் உற்சவர் அமரும் சிம்மாசன பீடம் மற்றும் தசாவதார சிற்பங்கள் வடிவமைக்கப்பட்டுள்ளன. தேர் செய்யும் சிற்பி ஆறுமுகம் கூறியதாவது: மர சிற்பம் தொடர்பான பணிகள் முழுமை அடைந்துள்ளன. திருச்சி "பெல் நிறுவனத்தில் இருந்து சக்கரம் இன்னும் வரவில்லை. பணிகளை விரைவில் முடித்து, பிப்ரவரி இறுதிக்குள் தேர் வெள்ளோட்டம் விட கோயில் நிர்வாகம் சார்பில் திட்டமிடப்பட்டுள்ளது,என்றார்.