நாகப்பட்டினம்: நாகை அடுத்த, வேளாங்கண்ணி ஆரோக்கியமாதா தேவாலயத்தில் புத்தாண்டையொட்டி, நேற்று முன்தினம் நள்ளிரவு, சிறப்பு பாடல் திருப்பலி நடந்தது. நாகை அடுத்த, வேளாங்கண்ணி புனித ஆரோக்கியமாதா தேவாலயத்தில், ஒவ்வொரு ஆண்டும், புத்தாண்டு திருவிழா, சிறப்பாக கொண்டாடப்படும். நாட்டின் பல்வேறு பகுதிகளில் இருந்து வந்திருந்த, ஆயிரக்கணக்கான பக்தர்கள், நேற்று முன்தினம் இரவு, திருத்தல கலையரங்கு முன் குவிந்திருந்தனர். தேவாலயத்தின் சார்பில், 2012 ம் ஆண்டை, நன்றியுடன் வழியனுப்பும் விதமாக இரவு, 11:00 மணியில் இருந்து, 11:45 மணி வரை பங்கு பாதிரியார் ஆரோக்கியதாஸ் தலைமையில், 10 க்கும் மேற்பட்ட பாதிரியார்கள் பங்கேற்ற, சிறப்பு பாடல் திருப்பலி நடந்தது. இரவு, 12:00 மணிக்கு, புத்தாண்டு பிறந்ததை முன்னிட்டு, தேவாலயம் சார்பில், அனைவருக்கும் வாழ்த்துக்கள் அறிவிக்கப்பட்டது. நேற்று காலை, 6:00 மணிக்கு, தேவாலயத்தில் பாதிரியார் மைக்கேல் தலைமையிலும், 8:00 மணிக்கு, பங்கு பாதிரியார் ஆரோக்கியதாஸ் தலைமையிலும், தமிழில் பாடல் திருப்பலி நடந்தது.