கோவை: கோவையில், வேதாத்திரி மகரிஷியின் "உலக சமுதாய சேவை மையம் சார்பில் உலக அமைதி தின விழா நேற்று நடந்தது. நிகழ்ச்சிக்கு, உலக சமுதாய சேவை மைய தலைவர் பச்சையப்பன் தலைமை வகித்தார் செயலாளர் ஹரிதாஸ் வரவேற்றார். இதில், பங்கேற்ற உலக சமூதாய சேவை மைய இணை இயக்குனர் அறிவானந்தம் பேசியதாவது:உலக அமைதி குறித்து மகரிஷி பல விளக்கங்களை அளித்து இருக்கிறார். நாம் செய்யும் செயல் ஒவ்வொன்றுக்கும் ஒரு விளைவு உண்டு. அவ்விளைவு நம் உடலுக்கும் மனதிற்கும் ஏற்றதாக இருந்தால் அது இன்பமானது. ஏற்றுக்கொள்ள வில்லை என்றால் அது துன்பமானது. இவை இரண்டும் இல்லாத நிலைதான் அமைதி. 1958ல் உலக சமுதாய சேவை மையத்தை மகரிஷி பதிவு செய்த போது. இச்சேவை மையம் எதற்காக என்று பலர் கேட்டனர். அதற்கு அவர் , "" ஓர் உலக ஆட்சி, ஒழுக்கத்தோடு குழந்தைகளை வளர்க்கும் திட்டம், உலகம் முழுவதும் பொருள் துறையில் சமநீதி, சீர்திருத்தம் சிக்கனம் சிறந்த வாழ்வு, தெய்வநிலை இறைவணக்கம், நேர் வழியில் விஞ்ஞானம் பயன் கொள்ளல் என ஏழு திட்டங்களை சொன்னார். இது எப்போது அமுலுக்கு வரும் என்று கேட்ட போது, உடனே வராது ஆனால், 100 ஆண்டுகளுக்கு பிறகு கண்டிப்பாக அமுலுக்கு வரும் என்றார்.உலகம் அமைதி பெற வேண் டும். உலக மக்கள் அனைவரும் இன்பமாக வழவேண்டும் என்பதுதான் வேதாத்திரி மகரிஷியின் கனவாக இருந்தது. அதற்காக அவர் பல பணிகளை செய்தார். இன்றைக்கு பல பேர் உலக அமைதி பற்றி பேசி வருகிறார்கள் ஏன் இன்னும் அமைதி வரவில்லை. காரணம் பேசுபவர்களே அமைதியாக இல்லை.உலகம் அமைதி பெற வேண்டும் என்றால் தனி மனிதன் அமைதி பெற வேண்டும்.அவன் அமைதி அடைந்தால் அவன் குடும்பமும் அமைதி அடையும், அவன் வாழும் ஊர், நாடு அமைதி பெறும். பிறகு இந்த உலகம் அமைதி பெறும். இதுதான் மகரிஷியின் சிந்தனை. உலக அமைதிக்கு எதிராக இருப்பது போர், முதலில் அதை தடுக்க வேண்டும் என்றார். இவை அமுலுக்கு வரவேண்டும் என்றால், அவர் சொன்ன வழிகளையும், பயிற்சி முறைகளையும் பின்பற்ற வேண்டும். அவர் ஒவ்வொன்றையும் பயிற்சி செய்து சோதனை செய்து பார்த்து பலனைஅறிந்த பிறகுதான் மற்றவர்களுக்கு போதித்தார். அதனால்தான் அவர் உருவாக்கிய மன வளக்கலையை அரசு அங்கீகரித்துள்ளது. பல்கலைக் கழகங்கள் பாடமாக ஏற்றுக் கொண்டுள்ளன. உலகம் முழுவதும் பல லட்சம் பேர் மன வளக்கலையை கற்று பயன் பெற்றுள்ளனர்.இவ்வாறு, அறிவானந்தம் பேசினார்.உலக சமுதாய சேவை மைய துணைத்தலைவர் வெள்ளிங்கிரி,கவிஞர் செல்லகணபதி, பயிற்சி ஒருங்கிணைப்பாளர் சுசிலா, பொருளாளர் அவினாஷ் வேலுச்சாமி உள்ளிட்டோர் பங்கேற்றனர்.