ஆரியங்காவு: கேரள மாநிலம் ஆரியங்காவு தர்மசாஸ்தா, புஷ்கலா தேவி திருக்கல்யாணத்தை முன்னிட்டு, மாம்பழத்துறையில் புஷ்கலாதேவி, ஜோதி ரூபமாக ஆவாஹனம் செய்து மணமகள் அழைப்பு சடங்கு நடந்தது.

புஷ்கலையின் தந்தையை, மதம் பிடித்த யானையிடம் இருந்து பகவான் காத்த இடம் மாம்பழத்துறை. இதுதான் உன்மகள் இனி வாசம் செய்யப் போகும் தலம் என்று பகவான் சொல்லாமல் சொல்லி சுட்டிக் காட்டிய இடம். ஜோதி ரூபத்தில் தேவி மாம்பழத்துறைக்கு வந்த கோலத்திலேயே உறைந்த திருமேனியாக காட்சி தரும் புஷ்கலாதேவி, மணமகள் அலங்காரத்தில் 8 கைகளில் 8 ஆயுதங்களை ஏந்தி, சத்தியத்திற்கு கட்டுப்பட்டவராக சர்வ அலங்காரத்தில் எழுந்தருளி இருக்கிறார். திருக்கல்யாண வைபவத்திற்கு தங்கள் குல தேவியை ஆரியங்காவுக்கு அழைத்துச் செல்ல அனைத்து ஊர்களில் இருந்தும் சவுராஷ்டிரா மக்கள் திரண்டு வந்திருந்தனர். மாம்பழத்துறை மக்கள், சவுராஷ்டிரா மக்களை மணமகள் புஷ் கலா தேவி குடும்பத்தா ராக ஏற்று, பூரண கும்ப மரியாதை யுடன் வரவேற்றனர்.

கருவறையில் சத்திய ஜோதியாக விளங்கும் அம்மனின் ஜோதி ரூப சைதன்யத்தை திருவிளக்கில் ஆவாஹனம் செய்து, ஜோதி ரூபத்தை, மேல்சாந்தி மது சர்மா, ஆரியங்காவு தேவஸ்தான சவுராஷ்டிர மஹாஜன சங்க நிர்வாகிகளிடம் வழங்கினார். சங்கத்தின் சார்பில் மூத்தத் தலைவர் சுப்ரமணியன் ஜோதி ரூபத்தை ஏந்திவர, ஆரியங்காவுக்கு ஊர்வலமாக ஜோதியை அழைத்து வந்தனர். சாஸ்தாவுடன் ஐக்கியம் ஆரியங்காவு ஊர் எல்லையில் கோயில் அதிகாரிகள், அட்வைசரி கமிட்டி நிர்வாகஸ்தர்கள், ஊர் மக்கள் ஜோதியை வரவேற்றனர். மாலை 6:45 மணிக்கு மங்கள குலவை முழங்க, சரண கோஷத்துடன் கருவறையில் ஐயனின் ஜோதியுடன் அம்பாள் ஜோதி ரூபமாக ஐக்கியமாகினார். ஏற்பாடுகளை மாம்பழத்துறை கோயில் அட்வைசரி கமிட்டி நிர்வாகிகள், ஆரியங்காவு தேவஸ்தான சவுராஷ்டிரா மஹாஜன சங்கத் தலைவர் ராகவன், பொதுச்செயலாளர் ராஜன், உப தலைவர்கள் ஹரிஹரன், ரவிச்சந்திரன், செயலாளர்கள் கண்ணன், மோகன், பொருளாளர் ஆனந்தம், நிர்வாகிகள் சரவணன், ஜெயக்குமார், பிரதீப் செய்தனர். மாம்பழத்துறை புஷ்கலா தேவி சவுராஷ்டிரா சபை தலைவர் மோகன், செயலாளர் அமர்நாத் தலைமையில் அனைவருக்கும் அன்னதானம் வழங்கப்பட்டது. திருவாங்கூர் தேவசம் போர்டு உறுப்பினர் ராஜூ, பகவான் பிரதிநிதியாகவும், ஆரியங்காவு தேவஸ்தான சவுராஷ்டிரா மகாஜன சங்கத் தலைவர் ராகவன் அம்பாள் பிரதிநிதியாக இருந்து வெற்றிலை, பாக்கு, சொர்ண புஷ்பம் மாற்றிக் கொள்ளும் நிச்சயதாம்பூலம் வைபவம் நடந்தது. பொதுச்செயலாளர் ராஜன் சடங்குகளை நடத்தி வைத்தார். இன்று (டிச., 26) திருக்கல்யாணம், நாளை மண்டலாபிஷேகம் நிறைவு பூஜையும் நடக்கின்றன.