பிரான்மலை: பிரான்மலை திருக்கொடுங்குன்றநாதர் கோயில் சித்திரைத் திருவிழா கொடியேற்றத்துடன் தொடங்கியது. குன்றக்குடி ஆதீனத்துக்கு உட்பட்ட இக்கோயில் சித்திரைத் திருவிழா இன்று தொடங்கியது. காலை 8:00 மணிக்கு கோயில் கொடிமரத்திற்கு உமாபதி சிவாச்சாரியார் தலைமையில் சிறப்பு அபிஷேகங்கள் செய்து வழிபாடு நடத்தப்பட்டது. 9:30 மணிக்கு கொடிமரத்தில் ரிஷப கொடி ஏற்றப்பட்டு திருவிழா துவங்கியது. தொடர்ந்து சுவாமி, அம்பாள் பரிவார தேவதைகளுக்கு காப்புக்கட்டப்பட்டது. ஏராளமான பக்தர்கள் பங்கேற்றனர். திருவிழாவை முன்னிட்டு 10 நாள் மண்டகப்படியாக தினமும் வெவ்வேறு வாகங்களில் சுவாமி திருவீதி உலா வருவர். ஏப் 25 ம் தேதி குயிலமுத நாயகி திருக்கொடுங்குன்றநாதருக்கு திருக்கல்யாணம் நடக்கிறது. ஏப் 29 ல் தேரோட்டமும், ஏப் 30 ல் தீர்த்தவாரியும் நடக்கிறது. ஏற்பாடுகளை குன்றக்குடி ஆதீனமும், ஐந்து ஊர் கிராமத்தினரும் செய்து வருகின்றனர்.