ஸ்ரீபெரும்புதுார்: வல்லக்கோட்டை முருகன் கோவிலில், திருக்கல்யாண உத்சவம் இன்று கோலாகலமாக நடந்தது.

ஸ்ரீபெரும்புதுார் அருகே உள்ள வல்லக்கோட்டையில் முருகன் கோவில் அமைந்துள்ளது. 1200 ஆண்டுகளுக்கு மேல் பழமை வாய்ந்த இக்கோவிலில், 7 அடி உயரத்தில் வள்ளி, தெய்வானையுடன் முருகப்பெருமான் அருள்பாலிக்கிறார். இக்கோவிலில் இன்று திருக்கல்யாண உத்சவம் கோலாகலமாக நடந்தது. காலை 7:30 மணிக்கு உற்சவர் வள்ளி, தெய்வனை சமேத சுப்பிரமணிய சுவாமிக்கு பால், தயிர், சந்தனம், பஞ்சாமிர்தம், பன்னீர் உள்ளிட்ட பொருட்களால் சிறப்பு அபிஷேகம் நடந்தது. அதை தொடர்ந்து, உற்சவ மூர்த்திகள் மணக்கோலத்தில் மயில் மண்டபத்தில் எழுந்தருளினர். காலை 11:30 மணிக்கு மங்கல வாத்தியங்கள் முழங்க திருக்கல்யாணம் நடந்தது. பின், உற்சவ மூர்த்திகள் கோவிலை வலம் வந்து அருள்பாலித்தனர். திருக்கல்யாண உற்சவத்தில் திரளான பக்தர்கள் பங்கேற்று தரிசனம் செய்தனர்.