பாலமேடு: பாலமேட்டில் பாறைக்கருப்புசாமி, முத்தாலம்மன், பால விநாயகர், பாலமுருகன் கோயில் பொங்கல் உற்ஸவம் ஜூன் 22ல் கொடியேற்றத்துடன் துவங்கியது.

பாறைக்கல் தெரு கரந்தமலை சுவாமி பங்காளிகள் சார்பாக மகா முனீஸ்வரர் கலைக்குழுவினரின் கும்மி பாட்டு நடந்தது. ஜூன் 28ல் கணபதி ஹோமத்துடன் பொங்கல் வைத்து அபிஷேகம் செய்தனர். மறவர்பட்டி சென்று வாணவேடிக்கை மேளதாளம் முழங்க முத்தாலம்மன் அழைத்து வந்தனர். பூஜாரி வீட்டிலிருந்து தீ வெட்டி, கரகாட்டத்துடன் நகை பெட்டி எடுத்து சென்று அம்மனை அலங்கரித்து மாரியம்மன் கோயில் முன்பாக கண் திறந்து சிறப்பு அபிஷேகம் செய்தனர். அன்றிரவு அம்மனுக்கு சக்தி கிடா வெட்டி வழிபட்டனர். 29ல் பக்தர்கள் அக்னிச்சட்டி, பால்குடம், மாவிளக்கு எடுத்தும், பொங்கல் வைத்து, உருண்டு கொடுத்து நேர்த்தி கடன் செலுத்தினர். நேற்று முளைப்பாரி எடுத்து ஊர்வலமாக சென்று கருப்பன் குளம் கண்மாயில் கரைத்தனர். அம்மன் பூஞ்சோலை சென்றார். அன்னதானம் வழங்கப்பட்டது. ஏற்பாடுகளை பறையர் உறவின்முறை சங்கத்தினர், முத்தாலம்மன் கோயில் திருப்பணி குழுவினர், இளைஞர் முன்னேற்ற சங்கத்தினர் செய்திருந்தனர்.