செங்கழுநீர் அம்மன் கோவில் ஆடித் திருவிழா என்றால் கோலாகலத்திற்குப் பஞ்சமிருக்காது. ஆண்டுதோறும் 11 நாட்கள் வெகு விமர்சையாக நடைபெறும். ஒவ்வொரு நாளும் ஒவ்வொரு சமூகத்து உபயதாரர்களின் உபயமாகக் களைகட்டும். இந்த கோலாகலத் திருவிழாவைக் காண சுற்றியுள்ள கிராமங்களில் இருந்து ஆயிரக்கணக்கான மக்கள் திரண்டு வருவார்கள். 50 ஆண்டுகளுக்கு முன் விழா தொடங்கும் நாளன்றே கிராம மக்கள் குடும்பம் குடும்பமாக மாட்டு வண்டிகளிலும், பொட்டி வண்டிகளிலும் வீராம்பட்டினத்திற்கு வந்து இறங்கி விடுவார்கள்.

இன்று நவீனமயமானதால் மாட்டு வண்டி, பொட்டி வண்டிகள் இன்றி கார், பஸ், வேன் உள்ளிட்ட வாகனங்களில் திரளுகின்றனர். இன்றளவும் வெளியூர்களில் வசிக்கும் வீராம்பட்டினத்தில் வசிப்பவர்களின் உறவினர்கள் திருவிழா நாட்களில் சொந்த ஊருக்குப் படையெடுத்து வருவார்கள். அப்படி வரும் உறவினர்களை வீராம்பட்டினத்து மீனவ மக்கள் சற்றும் முகம் சுளிக்காமல், நாள்தோறும் அறுசுவை விருந்தளித்து உபசரிக்கும் விருந்தோம்பல் குணம் இந்த மண்ணின் தனிப்பெரும் சிறப்பு.

அம்மனின் அருள் மழையோடு, சொந்தங்களின் அன்பும், திருவிழாவின் உற்சாகமும் ஒன்றிணையும் வீராம்பட்டினம் ஆடித் திருவிழா, என்றும் பக்தர்களின் மனதில் நீங்காத இடம்பெற்ற ஆன்மிகக் கொண்டாட்டமாகும்.